* ایم پی انجینیر رشیدَس دِژکھ بیمار مٲلِس نِش گژھنہٕ باپتھ 1 ہفتٕچ ضمانت*

دِلہِ ہایی کورٹَن دِژ بوموارِ دۄہ جیلَس منٛز آمٕتۍ ممبر پارلیمینٹ ایر عبدالرشید شیخَس سرینگرَس منٛز پننِس بیمار مٲلِس نِش گژھنہٕ خٲطرٕ اکہِ ہفتٕچ ضمانت۔خبر رساں ایجنسی کشمیر نیوز آبزرور (کے این او) نِش دٔستیاب تفصیلاتَو مُطٲبِق دِیُت عدالتَن زِ سُہ چھُ شیٚیہِ ؤرۍ یَو کھۄتہٕ زیادٕ وقتہٕ حراستَس منٛز۔ أمۍ ووٚن زِ "ریکارڈٕ وٕچھنہٕ پتہٕ چھُ عدالتٕچ راے زِ یہِ چھُ أکِس ہفتَس خٲطرٕ عبوری ضمانت دِنہٕ باپتھ موزوں معاملہٕ”۔أمِس چھُ یِمَن شرطَن پٮ۪ٹھ ضمانت دِنہٕ آمٕژ زِ سُہ کرِ 1 لَچھ رۄپیہِ ذٲتی بانڈ تہٕ امی رقمُک ضمانتی بانڈ، أمِس سۭتۍ آسہِ زٕ پولیس اہلکار تہٕ سُہ روزِ تتھ رِہٲیشی جایہِ یا ہسپتالَس منٛز ییٚتہِ أمۍ سُنٛد مول چھُ، ییٚمیُک پتہ یِیہِ فراہم کرنہٕ۔عدالتَن دِیُت یہِ تہِ نوٹ زِ تٔمِس یِیہِ نہٕ نیبر نیرنُک اِجازت دِنہٕ، سُہ کرِ صرف اکھ موبایِل نمبر استعمال یُس یِیہِ آن تھاونہٕ۔ "سُہ کرِ نہٕ کٲنٛسہِ گواہَس سۭتۍ رٲبطہٕ کرنٕچ یا کٲنٛسہِ پٮ۪ٹھ اثر انداز کرنٕچ کوٗشش۔ کانٛہہ تہِ غٲر ضروری دورٕ گژھِ نہٕ۔”