عمر عبداللہ ہَن کٔر ریاستی درجہٕ بحٲلی خٲطرٕ بیاکھ قراردادٕ پیش،بی جے پی ایم ایل اے یَن ہُنٛد ہنگامہٕ۔
جموں و کشمیرٕکۍ وزیر اعلیٰ عمر عبداللہ ہَن کٔر ازجموں و کشمیر قونوٗن ساز اسمبلی منٛز ریاستُک درجہٕ بحال کرنہٕ خٲطرٕ بیٛاکھ قرارداد پیش۔ بی جے پی یَن کٔر عبداللہ سٕنٛزِ قراردادٕچ مُخٲلِفت، یہِ ؤنِتھ زِ یِتھی قرارداد چھِ گۄڈَے اسمبلی منٛز پیش کرنہٕ آمٕژ۔
عمر عبداللہ ہن کٔر یہِ قرارداد ‘سوالیہ وقت’ کِس ٲخرس پیٹھ پیش۔ تٔمۍ ووٚن زِ یہِ قرارداد چھُ ریاستٕچ پوٗرٕ بحٲلی مُطالبہٕ کرن والٮ۪ن پٔتِمٮ۪ن قراردادن پتہٕ بیٛاکھ قدم۔
تٔمۍ ووٚن، ‘أسۍ چھِنہٕ اَکہِ قٕسمچی ریاستُک درجہٕ یژھان یَتھ منٛز امن و امان تہٕ باقٕے اَہَم اختیارَن پٮ۪ٹھ اسہِ کانٛہہ کنٹرول آسہِ نہٕ۔ موجودٕ نظامَس تحت چھُنہٕ اسہِ ہائیڈرو پاور پروجیکٹس یا میڈیکل کالجَن مُتعلِق فٲصلہٕ نِنُک کانٛہہ اِختِیار۔’
وزیر اعلیٰ ہَن دِیُت سپیکرَس زور زِ سُہ دِیِنی اتفاق رائے پٲدٕ کرنہٕ خٲطرٕ اَتھ قراردٲد پٮ۪ٹھ بَحَث کرنُک اِجازت۔ پتہٕ دِژ سپیکرَن اطلاع زِ قراردادَس پیٹھ ییہِ ژٔندٕروارِ دۄہ بَحَث کرن.