وزیر اعظم مودیَن کٔر ووٹرَن ہریانہ اسمبلی انتخاباتن منٛز ووٹنگ ریکارڈ کرنٕچ اپیل۔

90 رُکنن ہِنٛزِ ہریانہ ایٚسمبلی خٲطرٕ ووٹنگ گٔیہِ بَٹہٕ وارِ دۄہ صبحٲے 7 بجہِ أکِس مرحلَس منٛز شُروٗع۔ ییٚلہِ ووٹنگ شُروٗع گٔیہِ، ؤزیٖر اعظم نریندر مودِین کٔر ووٹرَن اسمبلی اِنتِخابس منٛز ٹرن آؤٹ کرنُک نوٚو رِکارڈ قٲیِم کرنٕچ اپیل تہٕ خاص طور پٲٹھۍ کٔرٕن گۄڈٕنِچہِ لَٹہِ ووٹرَن جمہوری تقریبن منٛز حصہٕ نِنہٕ خٲطرٕ حوصلہٕ اَفزٲیی۔
مودیَن کوٚر سوشل میڈیا ایکس پٮ۪ٹھ پوسٹ، "آز چھُ ہریانہ اسمبلی اِلیکشنَن باپتھ ووٹنگ جٲری”۔ بہٕ چھُس تمام ووٹرَن اپیل کران زِ تِم بَنَن جموٗرِیَت کِس یَتھ تہوارُک حِصہٕ تہٕ کٔرِن ووٹنگ ہُنٛد نوٚو رِکارڈ قٲیِم۔ اَتھ موقعَس پٮ۪ٹھ چھُ رِیاستٕک تِمَن تمام نوجوان دوستَن خاص سلام یِم گۄڈٕنِچہِ لَٹہِ ووٹ دِنہٕ وٲلۍ چھِ۔
ہریانہ کِس وزیر اعلیٰ نائب سنگھ سینی یَن تہِ کٔر لوٗکَن بھارتیہ جنتا پارٹی ہٕنٛز حمایت کرنٕچ اپیل ۔ "بہٕ، تُہُنٛد نایِب سِنٛگھ، چُھس تۄہہِ اپیل کران زِ 5 اکتوبر دبٲیِو کمل سُنٛد بٹن تہٕ بی جے پی کٔرِو زبردست اکثریتہٕ سۭتۍ زینُن۔ تُہُنٛد قۭمتی ووٹ دِیہِ ہریانہ چہِ ترقی برقرار تھاونہٕ تہٕ تیز کرنس منٛز مدد۔