لداخس منٛز پانٛژھ نٔوۍ ضِلعہٕ بناونٕچ اصوٗلی منظوٗری

مرکزی وزیر داخلہ امیت شاہن دِژ ژندر وارِ دۄہ سوشل میڈیا پلیٹ فارم ‘ایکس’ پٮ۪ٹھ أکِس پوسٹَس منٛز اَمہِ فٲصلہٕ مُتعلِق اطلاع زِ مرکزی وزارت داخلہَن چھِ مرکزی زیر انتظام علاقہٕ لداخَس منٛز پانٛژھ نٔوۍ ضِلعہٕ بناونٕچ منظوٗری دِژمٕژ تاکہ اکھ ترقی یافتہٕ تہٕ خۄشحال لداخ بناونُک وژن نافذ ییہِ کرنہٕ۔ زنسکار، دراس، شام، نوبرا تہٕ چانگتھانگ ضِلعن منٛز اِنتِظامِیہ مضبوٗط کرنہٕ سۭتہِ میلہِ مقٲمی لوٗکَن پننٮ۪ن گَرَن نزدیٖک سرکٲرِ سکیمَن ہُنٛد فٲیدٕ حٲصِل کرنس منٛز مدد۔لداخ چُھ رۄقبہٕ لحاظہٕ اکھ واریاہ بوٚڑ مركزی زیر انتظام علاقہٕ۔ لداخس چھِ وُنکیٚنَس زٕ ضِلعہٕ: لیہہ تہٕ کرگِل۔ یہِ چُھ ہِنٛدُستانس منٛز سارِوٕے کھۄتہٕ کم آبٲدی وول علاقو منٛزٕ اکھ۔ انتہٲئی مُشکِل تہٕ رسٲیی نہٕ آسنہٕ کِنہِ پییہِ ضِلعہٕ اِنتِظامیاہس تمہِ وِزِ زمیٖنی سطحس تام واتنس منز وارِیاہن مٗشكِلاتن ہٗند مٗقابلہٕ كرٗن ۔