سِیاسَت دان "ماجہِ زٮ۪وِ”کٲشرِ زبٲنۍ ہٕنٛدۍ سارِوٕے کھۄتہٕ بٔڈۍ دُشمن: ساگر کلچرل فورم

جموں و کشمیر اسمبلی کِس جٲری اجلاسَس دوران گوٚو اکھ تنازعہ ییٚلہِ سپیکر عبدالرحیم راتھرَن ایم ایل اے مبارک گُل کٲشرِس منٛز کتھ کرنہٕ نِشہِ رُکوو۔ ریاستٕچ نامور ادبی تہٕ ثقافتی تنظیٖم ساگر کلچرل فورم کشمیرَن چھُ اَتھ فٲصلَس پٮ۪ٹھ سٮ۪ٹھاہ افسوسُک تہٕ ناراضگی ہُنٛد اِظہار کوٚرمُت۔
اَمہِ کِس جوابَس منٛز ووٚن تنظیمٕکۍ سرپرست تہٕ مشہوٗر کٲشِرِ شٲعر ساگر نذیرَن زِ یِم سیٲسی رہنُما چھِ کٲشِرِ منٛز بولان ، کٲشِرِ بٲتھ گٮ۪وان تہٕ ووٹ حٲصِل کرنہٕ وِزِ چھِ عوامس پانس کُن متوجہ کرنٕچ کوٗشِش کران، مگر اقتدارس منٛز یِنہٕ پتہٕ چھِ تِم انگریزی طریقہٕ اختیار کرنٕچ کوٗشِش کران۔
تٔمۍ ووٚن زِ سپیکر سٕنٛز کٲشرِ زبٲنۍ پٮ۪ٹھ پابندی چھےٚ کٲشٕر شناخژن پٮ۪ٹھ اکھ تھاپٕر ۔ "یہِ چھےٚ سۄ کٲشِر زبان یۄسہٕ سانہِ ثقافت، تہذیب تہٕ شناختٕچ بُنیاد چھےٚ۔ امِچ بے عزتی یی نہٕ کُنہِ تہِ حالتس منز برداش کرنہٕ۔”