ُملٲزِمن ہٕنٛز برطرفی گژھِ نہٕ شَکَس پٮ۪ٹھ بلکہِ عدالتَن ہٕنٛدِ ذٔریعہٕ کرنہٕ یِنۍ: عمرعبداللہ

جموں و کشمیرٕکۍ وزیر اعلیٰ عمر عبداللہ ہَن ووٚن برٛٮ۪سوارِ دۄہ زِ سرکٲرِ مُلٲزِمن ہٕنٛزِ برطرفی ہُنٛد فٲصلہٕ گژھِ عدالتہٕ ذٔریعہٕ کرنہٕ یُن، نہ کہ شک کِس بُنیادس پیٹھ، تاکہِ انصافٕکۍ تقاضہٕ یِن پوٗرٕ کرنہٕ۔ ہندوٲرِس منٛز صحافیَن سۭتۍ کتھ باتھ کٔرِتھ ووٚن عمر عبداللہ ہن زِ پرٮ۪تھ سرکٲرِ مُلٲزِمَس سزا دِنہٕ برٛونٛہہ گژھِ پنُن دِفاع پیش کرنُک منصفانہ موقعہٕ دِنہٕ یُن۔ تٔمۍ ووٚن، ‘میون موقفٕ چھُ ہمیشہٕ یہِ زِ برطرفی گژھِ عدالتَو ذٔریعہٕ کرنہٕ یِنۍ۔ پرٛٮ۪تھ کٲنٛسہِ گژھِ پنُن دفاع کرنُک موقعہٕ دِنہٕ یُن۔’ وزیر اعلیٰ ہَن ووٚن بیٚیہِ زِ واریاہ مُلٲزِم یِم برطرف کرنہٕ آے آے پتہٕ بے گناہ ثٲبت گژھنہٕ پتہٕ پننٮ۪ن نوکرین پٮ۪ٹھ واپس، ییٚمہِ سۭتۍ یہِ ظٲہِر گژھان چھُ زِ یِتھۍ واریاہ فٲصلہٕ چھِ کمزور بنیادن پٮ۪ٹھ کرنہٕ آمٕتۍ۔ تٔمۍ ووٚن بیٚیہ، ‘اگر اصلی مُجرِمن سزا دِنہٕ چھِ یِوان، یہِ گژھِ عدالتہٕ ذٔریعہٕ کرنہٕ یُن۔ شَکَس پٮ۪ٹھ مبنی عمل چھِ پرٛٮ۪تھ کٲنٛسہِ نۄقصان واتناوان۔’