بڈگامَس منٛز غٲر قونوٗنی پٹرول پمپٕچ تعمیر بے نقاب اینٹی کرپشن بیوروَن کوٚر مقدمہٕ درٕج۔
جموں و کشمیر اینٹی کرپشن بیوروَن چُھ بڈگام ضِلعَس منٛز سرکٲرۍ زمینَس پٮ۪ٹھ پٹرول پمپ غٲر قونوٗنی طور تعمیر کرنَس مُتعلِق رُشوَت خوری تہٕ سٲزِش ہٕنٛدِس الزامَس تحت مقدمہٕ درٕج کوٚرمُت۔ یہِ کاروٲیی آیہِ أکِس شِکایتَس پٮ۪ٹھ کرنہٕ یَتھ منٛز یہِ وننہٕ اوس آمُت زِ اریگامَس منٛز اوس أکۍ شخٕصَن سرکٲرۍ چرایہِ زمینَس پٮ۪ٹھ اکھ غٲر قونوٗنی ڈھانچہٕ بنومُت۔ بیورو چہِ اِبتِدٲیی تحقیقاتَو سۭتۍ چھُ پتہ لوٚگمُت زِ اریگام بڈگامٕکۍ روزن وٲلۍ ثناء اللہ خان سٕنٛدۍ نیچِوۍ علی محمد خانَن اوس جوٗن 2020 ہَس منٛز گاسہٕ چرایہِ زٔمیٖنَس پٮ۪ٹھ اکھ پٹرول پمپ تعمیر کوٚرمُت (سروے نمبر 535)۔ تٔمۍ کٔر مبینہ طور لاسن حٲصِل کرنہٕ باپتھ حقائقَن منٛز ہیرا پھیری تہٕ حُکام گمراہ کٔرمٕتی۔ مٔزیٖد تٔحقیٖقاتَس منٛز آو یہِ پتہ لگاونہٕ زِ 2018 ہَس منٛز اوس أمِس نفرَس تمہِ وقتہٕ کِس پٹوٲری، اریگامٕکۍ نٲیِب تحصیلدار تہٕ تحصیلدار خان صٲبَن پٹرول پمپَس باپتھ نو آبجیکشن سرٹیفکیٹ (این او سی) دِژمٕژ۔