دِلہِ دھماکہٕ کٮ۪ن مجرمَن گژھِ سخٕت سزا دِنہٕ یُن، مگر بے گناہ لُکھ گژھن نہٕ شکس منٛز اننہٕ یِنۍ: عمر عبداللہ

جموں و کشمیرٕکۍ وزیر اعلیٰ عمر عبداللہ ہَن ووٚن زِ نوگام پُلیٖس تھانس منٛز حٲدثٲتی دھماکٕچ تفتیش چھےٚ جٲری، تہٕ یِمَن نزدیکی گھرَن تہِ یِیہِ معاوضہٕ دِنہٕ یِم امہِ دھماکہٕ سۭتۍ نۄقصان گوٚمُت چُھ۔

تٔمۍ ووٚن زِ مےٚ اوس وزیر اعلیٰ کانفرنسَس منٛز یہِ تہِ ذِکر کوٚرمُت زِ جموں و کشمیر، خاص کٔشیٖرِ منٛز گژھِ نہٕ پرٮ۪تھ کانٛہہ مسلمان شَک سان وُچھنہٕ یُن۔ دِلہِ دھماکہٕ کٮ۪ن ذِمہٕ وارَن گژھِ سخٕت سزا دِنہٕ یُن، مگر بےٚ گناہ گژھِ نہٕ اتھ دائرَس منٛز شٲمِل کرنہٕ یُن’۔

وزیر اعلیٰ یَن کوٚر یِمن خیالاتن ہُنٛد اظہار بوموارِ دۄہ ایجالا ہسپتالَس منٛز زخمی افرادَن ہٕنٛدِس دورَس دوران صحافیَن سۭتۍ کَتھ باتھ کٔرِتھ۔

نوگام دھماکَس مُتعلِق ووٚن تٔمۍ زِ ‘تفتیش چھےٚ جٲری، مگر یہِ چھُ افسوسناک زِ اَتھ واقعَس منٛز موٗدۍ واریاہ لوٗکھ پُلیٖٮس ارکان، ایف ایس ایل اہلکار، سول ایڈمنسٹریشنُک عملہٕ تہٕ باقٕے شٲمِل۔’