عمر عبداللہ ہَن کوٚر نوگام دھماکَس منٛز ہلاک گژھَن والٮ۪ن ہِنٛدٮ۪ن عیالَن سۭتۍ مُلاقات۔

جموں و کشمیرٕکۍ وزیر اعلیٰ عمر عبداللہ ہَن کوٚر بۄموارِ دۄہ صُبحٲے نوگام پولیس تھانہٕ حادثاتی دھماکَس منٛز ہلاک گژھن والٮ۪ن ہٕنٛدٮ۪ن عیالَن سۭتۍ ملاقات۔
تٔمۍ کوٚر غمگیٖن خاندانَن سۭتۍ تعزیتُک اظہار تہٕ تِمَن دیُتُن یٔقیٖن زِ حکوٗمت کَرِ تمام مُمکِن مدد۔
یہِ چھُ قٲبلِ ذِکِر زِ 14 نومبر چہِ رٲژ گوٚو نوگام پولیس تھانس منٛز اکھ حٲدثٲتی دھماکہٕ، یَتھ منٛز 9 نفر ہلاک تہٕ باقٕی 32 زخمی گٔے، یِمَن منٛز زیادٕ تر پولیس اہلکار ٲسۍ۔
عمر عبداللہ ہَن کٔر بۄموارِ دۄہ صُبحٲے اَتھ دھماکَس منٛز مارنہٕ یِنہٕ والٮ۪ن ہِنٛدٮ۪ن عیالَن سۭتۍ مُلاقات ۔
وزیر اعلیٰ سٕنٛدِس دفتر کِس ہینڈلَس پٮ۪ٹھ أکِس پوسٹَس منٛز اوس ونٛنہٕ آمُت، ‘اَز صُبحٲے کوٚر وزیر اعلیٰ نوگام پُلیٖس تھانس منٛز حٲدِثی دھماکَس منٛز ہلاک گَژھن والٮ۪ن ہِنٛدٮ۪ن عیالَن سۭتۍ مُلاقات ۔
پوسٹَس منٛز اوس بیٚیہِ وننہٕ آمُت، ‘تٔمۍ کٔر غمگیٖن خاندانَن سۭتۍ دِلہٕ تعزیتُک اِظہار، مرن والٮ۪ن ہٕنٛدٮ۪ن روحَن خٲطرٕ دُعا تہٕ تِمَن دیُتُن غم کِس وقتَس منٛز حکوٗمتکہِ طرفہٕ تمام مُمکِن مدتُک یقین ‘۔