پولیسَن چھُ امریکہَس منٛز روزَن وٲلِس کٲشِرِ علیحدگی پسند غلام نبی شاہ عرف ‘ڈاکٹر فائی’ سُنٛد غٲر منقولہ جائیداد ضبط کوٚرمُت،

بڈگام پُلیٖس طرفہٕ درخاستَس پٮ۪ٹھ کاروٲیی کٔرِتھ چھُ سپیشل این آئی اے کورٹ بڈگامَن امریکہس منٛز قٲیِم کٲشِرۍ علیحدگی پَسنٛد تہٕ فرار گژھَن وٲلِس مُلزِم غلام نبی شاہ عرف ‘ڈاکٹر فائی’ سُنٛد غٲر منقولہ جائیداد ضبط کرنُک حُکُم جٲری کوٚرمُت۔ یہِ کاروٲیی آیہِ بڈگام پُلیٖس تھانس منٛز درٕج کرنہٕ آمٕژ ایف آئی آر نمبر 46/2020 کِس سلسلَس منٛز کرنہٕ، یَتھ تحت غٲر قونوٗنی سرگرمیَن ہِنٛدِ روک تھام ایکٹَس سۭتۍ وابستہٕ دفعہٕ 10، 13 تہٕ 39 ہَس تحت مُلزِمن خٕلاف مقدمہٕ درٕج کرنہٕ آمُت چھُ۔ سرکٲرۍ ذرایعو مُطٲبِق کٔر عدالتَن یہِ کاروٲیی سی آر پی سی کِس دفعہٕ 83 (یُس بھارتیہ ناگرِک سرکشا سنہیتا 2023 کِس دفعہٕ 85 ہَس مُطٲبِق چھُ) تحت تِکیازِ مُتعلقہٕ عدالتَن اوس گۄڈَے غلام نبی شاہ فرار قرار دِیُتمُت۔ عدالتی حُکمن ہٕنٛز تعمیل کٔرِتھ آیہِ وادون گامَس منٛز سروے نمبر 466 ہَس تحت اکھ کنال تہٕ زٕ مارلہٕ زٔمیٖن تہٕ بڈگام ضِلعہٕ کِس چھٹا باغ گامَس منٛز سروے نمبر 343 ہَس تحت کاہ مارلہٕ زٔمیٖن ضبط کٔرمٕژ۔