کپواڑہ پوسٹ آفسٕچ تعمیر نو خٲطرٕ شائع کرنہٕ آمٕتۍ ٹینڈرس منٛز ضروٗرت پوٗرٕ کرنس منٛز تاخیر۔ پوسٹ ماسٹر جنرل، کشمیر سرکلَس کٔر تفتیش خٲطرٕ اپیل

10 دسمبر 2025 آو سپرنٹنڈنٹ پوسٹ آفس ڈویژن بارامولا ہٕنٛدِ دفتر طرفہٕ کپواڑہَس منٛز قٲیِم ضِلعہٕ ڈاک خانٕچ نوِ سرٕ تٔعمیٖر خٲطرٕ اکھ ٹینڈر جٲری کرنہٕ۔ وننہٕ چھُ آمُت زِ ٹینڈرٕ اوس زٲنِتھ مٲنِتھ اخبارَن منٛز شایع کرنہٕ آمُت یِم نہٕ محکمَن منظوٗر چھِ کٔرمٕتۍ تہٕ نہ چھِ ضِلعَس منٛز بٲگراونہٕ آمٕتۍ۔ اَتھ سلسلَس منٛز دِژ ضِلعہٕ کُپواڑہ ہٕنٛدیو حکامَو کشمیر پریس سروسَس اِطلاع زِ ییٚلہِ تہِ محکمہٕ کانٛہہ ٹینڈر جٲری چھُ کران، امیُک اشتہار چھُ اخبارن منٛز یِوان دِنہٕ یِم ضروٗری معیارَن پٮ۪ٹھ پوٗرٕ چھِ یِوان کرنہٕ، مگر گۄڈٕنِچہِ لَٹہِ آیہِ یِم اخبار نظر انداز کرنہٕ تہٕ ٹینڈر آو ژوٗرِ پٲٹھہِ کینٛہَن اخبارن منٛز أکِس سٲزِش ہٕنٛدِ حِصہٕ پٲٹھۍ شایع کرنہٕ، یُس نہٕ کٲنٛسہِ تہِ وُچھمُت۔ تِمَو ووٚن زِ اَمہِ قٕسمٕچ سٲزِش چھِ محکمٕچ شبیہہ خراب کران۔ تِمَو کٔر کشمیر سرکلٕکۍ پوسٹ ماسٹر جنرلس اپیل زِ سُہ کٔرِن اتھ سنجیدٕ معاملٕچ تفتیش تہٕ روایتی تہٕ معموٗل طٔریٖقہٕ کارَن پٮ۪ٹھ عمل کٔرِتھ ٹینڈر دُبارٕ شایع کرنہٕ۔