پلوامس منٛز غٲر قونوٗنی کان کنی خٕلاف کاروٲیی منٛز اکھ جے سی بی تہٕ زٕ ٹریکٹر ضبط: پولیس

غٲر قونوٗنی کان کنی خٕلاف پنٕنۍ جامع مُہِم جٲری تھٲوِتھ کوٚر پلوامہ پولیسَن غٲر قونوٗنی میٚژ کڑنَس منٛز شٲمِل اکھ جے سی بی تہٕ زٕ ٹریکٹر ضبط تہٕ اَتھ سلسلَس منٛز کوٚرُکھ مقدمہٕ درٕج۔ پُلسہٕ کہِ ترجمانَن ووٚن زِ پلوامہ پولیسٕکہِ أکہِ ٹیٖمَن لوٚگ معموٗل گشتَس دوران نوناگری گامَس منٛز غٲر قونوٗنی طور میٚژ کڑنُک تہٕ نقل و حملُک پتہٕ۔ تٔمۍ ووٚن زِ کاروٲیی دوران آو رجسٹریشن نمبر JK13J-8922 ہیتھ اکھ جے سی بی یُس ریاشی کِس روزَن وٲلِس مبارک شاہ سُنٛد نیچو شفیق حسین سٕنٛدِ دٔسۍ چلاوان اوس، غٲر قونوٗنی طور کڑنہٕ آمٕژ میٚژ ٹریکٹَرن پٮ۪ٹھ لوڈ کران لبنہٕ آمُت۔ تٔمۍ ووٚن زِ پُلسہٕ ٹیٖمَن کٔر فوری کاروٲیِی، گاڑِ رُکٲوِکھ تہٕ نِیِکھ اتھ غٲر قونوٗنی سرگرمی منٛز شٲمِل زٕ ٹریکٹر تہِ حراستَس منٛز۔ ترجمانَن ووٚن زِ پُلیٖس تھانہٕ کِس لٹرَس منٛز آو مُتعلقہٕ دفعَن تحت ایف آئی آر نمبر 115/2025 تحت مقدمہٕ درٕج کرنہٕ، تہٕ مٔزیٖد تفتیش چھِ شُروٗع کرنہٕ آمٕژ۔ تٔمۍ ووٚن زِ پلوامہ پولیس چھِ قۄدرتی وسٲیلَن ہٕنٛدِ حِفاظتہٕ باپتھ پرعزم ۔