عوٲمی خدمت چھِ سون مِشن، أسۍ چھِ تمام وسٲیل استعمال کران: ایڈوکیٹ شوکت میر

نیشنل کانفرنسٕکۍ ریاستی صدر ایڈووکیٹ شوکت احمد میرَن ووٚن زِ پارٹی صدر عمر عبداللہ سٕنٛزِ قیادتس منٛز چھِ عوٲمی حکومت جموں و کشمیر کین لوٗکَن ہٕنٛز راحت تہٕ فلاح و بہبودٕ خٲطرٕ تمام مُمکِن وسٲیِلَن ہُنٛد پوٗرٕ استعمال کران۔ تٔمۍ ووٚن زِ یو ٹی اِنتِظامیہ ماڈلہٕ باوجوٗد چھُنہٕ پٔتِمٮ۪ن ؤرۍ یَن دوران عوٲمی خٕدماتن منٛز کانٛہہ تہِ کٔمی آمٕژ۔ شوکت میرَن ووٚن آز سرینگرَس منٛز پارٹی ہیڈ کوارٹرَس منٛز مُختٔلِف عوٲمی وفدَن، پارٹی عہدیدارَن تہٕ کارکُنَن سۭتۍ ملاقاتَس دوران۔ ملاقاتس دوران بوز تٔمۍ نہ صرف لوکن ہٕنٛدۍ خدشات توجہ سان بلکہ کٔرٕن موقعس پیٹھ موجود متعلقہٕ حکامَن سۭتۍ فوری حل خٲطرٕ رٲبطہٕ۔ تٔمۍ ووٚن زِ نیشنل کانفرنسن چُھ ہمیشہٕ زمینی سطحس پیٹھ لوکن سۭتۍ براہ راست رٲبطہٕ برقرار تھومُت، چاہے محلن منٛز، گامَن یا قصبن منٛز۔ عوٲمی مصروفیت چھِ سون امتیاز، تہٕ یہِ چھِ نیشنل کانفرنسٕچ حقیقی شناخت تہِ۔ شوکت میرَن ووٚن بیٚیہِ زِ نیشنل کانفرنسٕچ سیاستُک بُنیٲدی مرکز چھُ ہمیشہٕ عوٲمی بہبود۔