گاندر بلَس منٛز غٲر قونوٗنی طور معدنیات کڑنَس تہٕ نقل و حملَس منٛز شٲمِل 9 گاڑِ ضبط: پُلیٖس

غٲر قونوٗنی معدنیات کٔڑنَس خٕلاف مُہِم جٲری تھٲوِتھ چھِ گندر بل پولیسَن پوٗرٕ ضِلعَس منٛز مُختٔلِف کارروائیَن دوران غٲر قونوٗنی معدنیات کڑنَس تہٕ نقل و حملَس منٛز شٲمِل 9 گاڑِ ضبط کٔرمٕژ۔
پُلسہٕ کہِ ترجمانَن ووٚن أکِس بیانَس منٛز زِ گندربل پُلسہٕ ٹیٖمَو کٔر غٲر قونوٗنی معدنیات کڑنَس تہٕ نقل و حملَس منٛز شٲمِل 9 گاڑِ ضبط، یِمَن منٛز 7 ٹِپر تہٕ 2 ٹریکٹر شٲمِل چھِ۔
تٔمۍ ووٚن زِ یِم گاڑِ آسہٕ گندر بل پولیس تھانہٕ کِس دٲیرٕ اختیارس منٛز معدنیات غٲر قونوٗنی طور کڑنَس تہٕ نقل و حملَس منٛز مُلوث لبنہٕ آمٕژ۔
تٔمۍ ووٚن زِ یِم گاڑِ چھِ ضروٗری اجازت نامہٕ ورٲے نالہ سندھ پٮ۪ٹھٕ غٲر قونوٗنی طور کڑنہٕ آمُت مواد منتقل کران۔
پُلسہٕ ترجمانَن ووٚن زِ محکمہٕ ارضیات تہٕ کان کنی سۭتۍ قریبی تال میل کٔرِتھ کٔر پولیسَن فوری کاروٲیی تہٕ کٔرٕکھ یِم گاڑِ موقعہٕ پٮ۪ٹھے ضبط۔
تٔمۍ ووٚن ووٚن زِ غٲر قونوٗنی کڑنہٕ سۭتۍ چھُ نہ صرف حکومتی خزانہٕ نۄقصان واتناوان بلکہِ چھُ خطہٕ کِس ماحولیٲتی توازنس تہِ شدید خطرٕ بنان۔