سُکھناگ نالہ چھُ عوامس خٲطرٕ وقف۔ نوٚو رِشننگ سٹیشن گژھِ 4 پٮ۪ٹھٕ 5 رٮ۪تَن منٛز تیار: عمرعبداللہ

جموں و کشمیرٕکۍ وزیر اعلیٰ عمر عبداللہ ہَن ووٚن زِ حکوٗمت چھِ ریاستہٕ کِس پرٮ۪تھ علاقَس منٛز ترقی ہٕنٛز عمل تیز کرنہٕ تہٕ ترجیحی بنیادَن پٮ۪ٹھ عوامٕچ ضروٗرتہٕ پوٗرٕ کرنہٕ باپتھ سٔنٛجیٖدٕ کوٗشِش کران۔ تٔمۍ ووٚن زِ بیرووہ حلقُک تٔمۍ سُنٛد دورٕ تہِ چھُ اَمہِ کوٗششہِ ہُنٛد اکھ حصہٕ، ییٚتہِ واریاہَن مُکمل ترقیاتی منصوبَن ہُنٛد افتتاح آو کرنہٕ تہٕ واریاہَن نوٮ۪ن منصوبَن ہٕنٛز بُنیاد آیہِ تراونہٕ۔ جُمعہ دۄہ بیرواہَس منٛز نامہ نگارن سۭتۍ کتھ باتھ کٔرِتھ ووٚن وزیر اعلیٰ زِ سُہ چھُ پرٮ۪تھ علاقَس منٛز مساوی ترقی انٛنہٕ باپتھ کٲم کران تہٕ بیرواہ یِنُک مقصد چھُ یَتہِ جٲری تعمیٖرٲتی تہٕ ترقی ہٕنٛزِ سرگرمی تیز کرٕنۍ۔ تَفصیٖلات دِوان ووٚن تٔمۍ زِ بیرووہ حلقَس منٛز آیہِ تقریباً 260 ملین رۄپیہِ ہٕنٛدِ مُختٔلِف عوٲمی منصوبَن ہُنٛد افتتاح کرنہٕ، ییٚلہِ زَن بُنیٲدی ڈھانچہٕ مزید بہتر بناونہٕ خٲطرٕ آیہِ باقٕے واریاہَن سکیمَن ہٕنٛز بُنیاد تہِ تراونہٕ۔