دِلہِ اسمبلی چُناون خٲطرٕ گٔیہِ ووٹنگ شُروٗع۔

دِلہِ اسمبلی ہٕنٛزن تمام 70 سیٹن خٲطرٕ ووٹنگ گٔیہِ بۄدوارِ دۄہ صبحٲے 7 بجہِ سخٕت حِفاظتس منٛز شُروٗع تہٕ روزِ شامَس 5 بجے تام جٲری۔
دِلہِ ایٚسمبلی اِنتِخابس سۭتہِ سۭتہِ چھِ آز دۄن رِیاستن منٛز دۄن ایٚسمبلی سیٖٹن پیٚٹھ ضِمنی اِنتِخابات سپدان۔ تامِل ناڈوٗ چہِ ایروڈ اسمبلی سیٖٹہِ تہٕ اُتر پرٛدیشٕچہِ مٔلِکی پوٗر ایٚسمبلی سیٖٹہِ خٲطرٕ تہِ گٔیہِ صُبحٲے 7 بجہِ پولنگ شُروٗع۔ یِم زٕ سیٹہٕ آیہِ ایروڈ ایم ایل اے ای وی کے ایس ایلانگوین سٕنٛدِ مرنہٕ تہٕ ایودھیا کِس مالکی پوٗرٕک ایم ایل اے اودھیش پرساد سٕنٛدِ اِستِفہٕ پتہٕ خٲلی ۔
دِلہِ ہِنٛدِ چیف الیکٹورل آفیسر آر ایلس وازَن چھِ قومی رازدٲنہِ ہٕنٛدٮ۪ن تمام ووٹرَن اپیل کٔرمٕژ زِ تِم یِن پننیو گھرو منٛزٕ نٮ۪بر تہٕ بٔڑِس تعدادَس منٛز ووٹ دِیُن۔ اِلیکشَن کٔمِشنَن چھِ منصفانہٕ تہٕ پُر امن پولنگ یقینی بناونہٕ خٲطرٕ حِفاظتٕکہِ زبردست اِنتِظام کٔرِمٕتہِ یَتھ تحت کُل 97,955 عملہٕ تہٕ 8,715 رضاکار تعینات کرنہٕ آمٕتہِ چھِ ۔ سینٹرل ریزرو پولیس فورسٕچ 220 کمپنیہِ، 19,000 ہوم گارڈ اہلکار تہٕ 35,626 دہلی پولیس اہلکار چھِ تعینات کرنہٕ آمٕتۍ۔