دِلہِ دھماکس منٛز 12نفر ہلاک تہٕ شدید زمی سپدٕنۍ چُھ اکھ انتہٲیی افسوسناک تہٕ تکلیف دِنہٕ وول واقعہ: میر واعظ سُنٛد بجہِ مٔشیٖدِ منٛز خطاب

میر واعظ کشمیرڈاکٹر مولوی محمد عمر فاروقن ووٚن نماز جمعہ کِس موقعس پیٹھ سرینگرٕچ مرکزی بجہِ مٔشیٖدِ منٛز أکِس بٔڑِس اجتماعس خٕطاب کران زِ دِلہِ منٛز حالٕے بم دھماکس منٛز 12 بےٚ گناہ لُکھ پنٕنۍ دۄہ دِش کِس معموٗلَس منٛز آوٕر ہلاک گژٕھنۍ تہٕ باقٕی واریاہ شدید زخمی گژٕھنۍ چھُ اکھ انتہٲیی افسوسناک تہٕ تکلیف دہ واقعہٕ۔ یِتھۍ واقعہٕ چھِ انسانیتس پٮ۪ٹھ حملہٕ۔ تاہم یہِ چھُ واریاہ افسوسناک زِ یِتھۍ واقعہٕ چھِ حقیٖقت برونہہ کُن یِنہٕ برٛونٛہٕے ‘أنٛدروٗنی ذٔریعَن’ ہٕنٛدِ مدتہٕ سۭتۍ میڈیا کہِ طرفہٕ سنسنی خیز بناونہٕ یِوان، ییٚمہِ سۭتۍ اکھ یِتھۍ حالت پٲدٕ گژھان چھِ یِم فوری طور اتھ کُنہِ خاص مذہبس یا فرقس سۭتۍ جوڑنٕچ تہٕ تِمن مُجرِم قرار دِنٕچ کوٗشش کران چھِ۔ اَمہِ کِس نٔتیٖجَس منٛز چھِ مُلکہٕ کٮ۪ن مُختلِف رِیاستَن تہٕ شہرَن منٛز تعلیٖم یا روزگارٕ باپتھ روزَن وٲلۍ سانۍ شُرۍ تہٕ نوجوان اچانک شک کِس زَدس منٛز گَژھان، تہٕ یِمن ہٕنٛدِ حفاضتہٕ خٲطرٕ چھِ أسۍ خوفزدٕ گَژھان، تہٕ اَمہِ سۭتۍ چھِ یِہنٛدِس عیالَس منٛز سٮ۪ٹھاہ پریشٲنی پٲدٕ سپدان۔