کشمیر یونیورسٹی پٮ۪ٹھہٕ سکمز تہٕ ڈل جھیٖلَس تام ہاپتہٕ سٕنٛز حٲران کُن موجودگی، لوٗکَن منٛز خوف تہٕ دہشت۔

شہرٕ کِس مضافاتَس منٛز أکِس جنگلی ہاپتہٕ سٕنٛز تلاش یۄسہٕ پٔتمہِ ہفتہٕ پٮ۪ٹھہٕ جٲری چھےٚچھےٚ زِیٛادٕ پیچیدٕ گٔمٕژ۔ ہاپتہٕ سٕنٛزِو غٲر متوقع حرکتَو چھُنہٕ صرف شہرین منٛز شدید خوف پٲدٕ کوٚرمُت بلکہِ جنگلی حیاتٕکۍ حٲکِم تہِ چھِ مسلسل کوٗشِشن باوجوٗد اتھ قوبوٗ کرنس منٛز ناکام ۔ حالٕے أکِس واقعَس منٛز آو ہاپُت راتھ شامَس نگیٖن جیٖلَس منٛز غوطہٕ دِوان وُچھنہٕ، ییٚمہِ پتہٕ پوٗرٕ رٲژ آپریشن جٲری روٗد، مگر حُکامَو مُطٲبِق آو نہٕ أمۍ سُنٛد کانٛہہ تہِ نِشانہٕ لبنہٕ۔
یہِ ہاپُت آو گۄڈنِچہِ لَٹہِ 26 نومبر کشمیر یوٗنیورسٹی نزدیٖک وُچھنہٕ، ییٚتہِ أمِس ہوسٹلَس برٛونٛہہ کنہِ آوارٕ ہونٮ۪ن ہِنٛدِس أکِس بنڈلَس نِش بچنہٕ خٲطرٕ ژلُن پیوٚو۔ اَمہِ پتہٕ آو یہِ سکمز علاقہٕ تہٕ شہر کٮ۪ن واریاہن باقٕے حِصن منٛز وُچھنہٕ، ییٚمہِ سۭتۍ بسکیٖنن منٛز افراتفری پٲدٕ گٔیہِ۔ وائلڈ لائف ڈیپارٹمنٹُک ونُن چھُ زِ شہری علاقَن منٛز اژنہٕ پتہٕ چھُ ہاپُت غٲر مُتوقعہٕ وَتہٕ نِوان، ییٚمہِ سۭتۍ یہِ ٹریک کرُن سیٚٹھاہ مُشکِل چھُ گژھان۔