عمر عبداللہ سٕنٛدِس صدارتَس منٛز کابینہ اجلاس، دۄہ مزوٗر کرَن والٮ۪ن ہٕنٛز رپورٹ آیہِ منٛگنہٕ

جموں و کشمیر کِس وزیر اعلیٰ عمر عبداللہ سٕنٛدِس صدارتس منٛز آو بۄدوارِ دۄہ صُبحٲے اکھ اہم کابینہٕ اجلاس منعقد کرنہٕ، یَتھ منٛز مُختٔلِف محکَمو طرفہٕ واریاہَن اَہَم تجویٖزَن ہٕنٛز منظوٗری آیہِ دِنہٕ۔ یہِ میٹنگ آیہِ صبحٲے 9 بجہِ جمِس منٛز وزیر اعلیٰ سٕنٛزِ رِہٲیشہِ پیٹھ مُنعقد کرنہٕ، ییٚتہِ خاص طور پبلِک ورکس ڈیپارٹمنٹَس منٛز افسرَن ہٕنٛزِ ترقی مُتعلِق تفصیٖلی بَحَثہٕ پتہٕ منظوٗری آیہِ دِنہٕ۔
سرکٲرۍ ذرایعَو ووٚن زِ میٹنگہِ منٛز آیہِ بجلی محکمہٕ، ریزرویشن پالیسی تہٕ وندٕ چہِ تیٲری سۭتۍ وابستہٕ معاملَن پٮ۪ٹھ تہِ کتھ کرنہٕ۔ اتھ وقتس دوران آیہِ مویشی تہٕ ماہی گیری شعبس سۭتۍ وابستہٕ کوآپریٹو سوسائٹین مضبوٗط بناونہٕ خٲطرٕ مالی امدادچ منظوری تہٕ دِنہٕ۔
میٹنگہِ پتہٕ ووٚن کابینی وزیرِ جاوید رانا ہَن صحافیَن زِ واریاہَن اَہَم ایجنڈَن چھےٚ منظوٗری دِنہٕ آمٕژ، یِمَن منٛز آر اینڈ بی محکمَس منٛز افسرَن ہٕنٛز سینئرٹی ہٕنٛز توثیق تہٕ ترقی دِنۍ چھےٚ ساروٕے کھۄتہٕ زیادٕ نمایاں۔