شوپیانَس منٛز گرٕ منٛزٕ وارِیاہ مٮ۪قدارَس منٛز چرٕس ہیوٗ مادٕ برآمد، مُلزِم گِرِفتار:پُلیٖس

منشیاتن خٕلاف کریک ڈاؤن جٲری تھٲوِتھ چھُ شوپیان پولیسَن سفانگری زین پورہ کِس أکِس رہٲیشی مکانَس منٛز بٔڑِس مٮ۪قدارس منٛز چرٕش ہیوٗ ممنوعہ مادٕ برآمد کوٚرمُت۔
پُلسہٕ ترجمانَن ووٚن أکِس بیانَس منٛز زِ مخصوٗص خُفیہ پٲٹھۍ کٲم کٔرِتھ کوٚر زین پورہ پُلیٖس تھانن این ڈی پی ایس ایکٹَس تحت ایف آئی آر نمبر 120/2025 تحت مقدمہٕ درٕج تہٕ کوٚرُکھ چیف جوڈیشل مجسٹریٹ (سی جے ایم) شوپیان سٕنٛدِ معزز کورٹہٕ پٮ۪ٹھہٕ تلاشُک وارنٹ حٲصِل۔
تٔمۍ ووٚن زِ زین پورہ پولیس تھانٕکۍ أکۍ ٹیٖمَن ترٛوو فرسٹ کلاس ایگزیکٹو مجسٹریٹَس سۭتۍ مِلِتھ سفانگری زین پورہ کِس روزَن وٲلِس فاروق احمد ڈار سٕنٛدِس گھرَس پٮ۪ٹھ چھاپہٕ۔
تٔمۍ ووٚن زِ تلٲشی دوران آو گَرٕ منٛزٕ 7 کِلو تہٕ 900 گرام چرٕس ہیوٗ ممنوعہ مادٕ برآمد کرنہٕ۔
پُلسہٕ ترجمانَن ووٚن زِ مُلزِم اوس گِرِفتار کرنہٕ آمُت تہٕ اَتھ سلسلَس منٛز چھُ مٔزیٖد تفتیش شُروٗع کرنہٕ آمٕژ۔
تٔمۍ ووٚن زِ شوپیان پولیس چُھ ضِلعہٕ منٛز منشیات پوٗرٕ پٲٹھۍ ختم کرنہٕ باپتھ پُرعزم ۔