یاسمینہ بانوَس آو کٲشرس محکمس منٛز سۄنہٕ سند میڈل دِتھ یزتھ افضٲیی کرنہٕ .کے پی ایس میڈیا گروپ تہ کہوٹ طرفہٕ دِلہٕ مبارکباد.

وسطی گندر بلٕچ قٲبِل طٲلبہِ عٔلِم تہٕ جموں و کشمیرٕکۍ وٲحِد کٲشِرِ روزنامہٕ ‘کہوت’ ہٕنٛز نیوز ریڈر، زیرون کنگن کِس روزَن وٲلِس غلام قادر مگرے سٕنٛز کورِ یاسمینہ بانوَن کٔر کشمیر یونیورسٹی ہٕنٛدِس کٔشیٖرِ شعبَس منٛز ماسٹرز ڈگری پوٗرٕ کٔرِتھ اکھ شاندار پوزیشن حٲصِل۔ اَمہِ پتہٕ آو أمِس شیرِ کشمیر گولڈ میڈل عتا کرنہٕ۔ تٔمِس مِیوُل یہِ تمغہٕ کشمیر یونیورسٹی کِس 21 مِس کانووکیشنَس دوران ییٚمیُک صدارت ہندوستانُک نٲیِب صدر سی پی رادھا کرشنن اوس کوٚرمُت۔ امہِ کامیٲبی سۭتۍ کوٚر یاسمینہ خانَن پنٕنۍ صلٲحیتُک مُظٲہرٕ تہٕ کوٚرُن پننِس علاقَس منٛز فخر۔ اَتھ کامیٲبی پیٹھ کٔر کشمیر پریس سروس میڈیا گروپٕچ قیادت، خاص طور چیئرمین آکاش امین بٹَن یاسمینہ خانَس دِلہٕ دِلہٕ مبارکباد تہٕ تٔمِس خٲطرٕ نیک خواہشات ہُنٛد اظہار۔ أتھۍ دوران چھِ مختلف سمٲجی تہٕ صحافتی شخصیاتو تہِ یاسمینہ بانو ہَس امہِ کامیٲبی خٲطرٕ مبارک باد دِژمٕژ۔