کاؤنٹر انٹیلی جنس کشمیرک وادی کشمیر کٮ۪ن واریاہَن مقامَن پٮ۪ٹھ چھاپہٕ .

کاؤنٹر انٹیلی جنس کشمیر (سی آئی کے) کٔر حالٕے درٕج کرنہٕ آمتِس معاملَس کِس سلسلَس منٛز برٛسوارِ دۄہ صُبحٲے وادی کٮ۪ن مُختٔلِف ضِلعن منٛز بٔڑِس پیمانَس پٮ۪ٹھ تلاشٕچ کاروٲیی ۔ ذرایعو مُطٲبِق آیہِ یِم چھاپہٕ جنوٗبی کٔشیٖرِ کِس شوپیان ضِلعس سۭتۍ سۭتۍ وسطی کشمیر کِس سری نگر تہٕ گندر بل ضِلعن منٛز واریاہن مقامن پٮ۪ٹھ کرنہٕ۔ ذرایعَو ووٚن زِ یِم کاروٲیی چھِ مُنٲسِب منصوٗبہٕ بٔنٛدی حِکمت عملی تحت انجام دِنہٕ یِوان، تہٕ یِمَن باپتھ چھِ قٲبِل عدالتہٕ نِش سرکٲرِ تلاشٕک وارنٹ حٲصِل کرنہٕ آمٕتۍ۔ یِم چھاپہٕ چھِ سی آیی کے پُلیٖس تھانس منٛز ایف آئی آر نمبر 01/2026 تحت درٕج کرنہٕ آمٕتہِ أکِس کیسٕس سِلسِلس منٛز کرنہٕ یِوان۔ تلاشٕچ کارروائیَن دوران آو شَکاوَر مقامَن ہُنٛد پوٗرٕ پٲٹھۍ جٲیزٕ کرنہٕ۔ وونہِ گٔیہِ نہٕ فوری گِرِفتٲری یا ضبطی مُتعلِق کانٛہہ تہِ سرکٲرِ تَفصیٖل برونہہ کُن۔ أتھۍ دوران چھُنہٕ کاؤنٹر انٹیلی جنس کشمیرَن وُنیُک تام اَتھ معاملَس مُتعلِق کانٛہہ تَفصیٖلی سرکٲری بیان جٲری کوٚرمُت۔