ایل جی یَن ووٚن زِ امن تہٕ سازگار ماحولَن چھُ جموں و کشمیر عالمی معیارٕک کھیلن ہٕنٛدِ مُقابلَن ہٕنٛز میزبٲنی خٲطرٕ اکھ اَہَم مُقام بَنوومُت۔

جوٚمَس منٛز آتھٕوارِ دۄہ مُنعقد جموں میراتھن ہٕنٛزِ اختتٲمی تقریٖبہِ منٛز دِیُت لیفٹیننٹ گَورنَر منوج سنہاہَن زینَن والٮ۪ن کھلٲڑٮ۪ن انعام تہٕ وونُن زِ یہِ میراتھن چھِ تِمَن مثبت تبدیلین ہُنٛد عکاس کران یِم 2019 پٮ۪ٹھٕ جموں و کشمیرَس منٛز آمٕژ چھِ۔ سُہ اوس مولانا آزاد سٹیڈیمَس منٛز مُنعقد گژھن واجنہِ تقریٖبہِ خٕطاب کَران، ییٚتہِ گۄڈٕنِچہِ بین الاقوٲمی ہاف میراتھنٕچ کامیاب تنظیم آیہِ مناونہٕ تہٕ کھلٲڑین ہٕنٛز حوصلہٕ افزٲیی آیہِ کرنہٕ۔ مُلکَس اندر تہٕ نٮ۪برِمٮ۪و مُلکَو پٮ۪ٹھ ترٛےٚ ساس کھۄتہٕ زِیٛادٕ دورَن والٮ۪و نِیوو اَتھ میراتھنَس منٛز حصہٕ، یَتھ منٛز 21 کِلومیٖٹر، 10 کِلومیٖٹر تہٕ 5 کِلومیٖٹر دورٕ شٲمِل ٲس۔ لیفٹیننٹ گورنرَن ووٚن زِ امن، خۄشحٲلی تہٕ سازگار ماحولَن چھُ جموں و کشمیر عالمی معیارٕک کھیلن ہٕنٛدِ مُقابلَن ہٕنٛز میزبٲنی خٲطرٕ اکھ اَہَم مُقام بَنوومُت۔ أمۍ سٕنٛدِ مُطٲبِق چھُ جۄمَن وۄنۍ عالمی نقشَس پٮ۪ٹھ اکھ مضبوٗط شناخت قٲیِم کٔرمٕژ، تہٕ یِتھۍ بٔڑۍ تقریبہٕ سۭتۍ میلہِ سیاحتَس فروغ دِنہٕ، ییٚمہِ کِس نتیجَس منٛز تجارت تہٕ کارٕبارَس منٛز تہِ ہُریر گَژھِ۔