جموں و کشمیرَس منٛز بیٚیہِ زٕ سرکٲرِ مُلٲزِم کٔرِکھ دہشت گردی ہٕنٛدِس مُبیعنہٕ تعلقَس پٮ۪ٹھ برطرف ایل جی اِنتِظامیہَن کٔر یِم سرکٲرِ مُلٲزِم لشکر طیبہ تہٕ حزب المجاہدین ہِوین دہشت گرد تنظیمَن سۭتۍ رٲبطہٕ کِس الزامَس پٮ۪ٹھ برطرف ۔

بۄدوارِ دۄہ جموں و کشمیرَس منٛز کٔر لیفٹیننٹ گورنر منوج سنہاہَن دہشت گرد تنظیمَن سۭتۍ مبینہٕ تعلقاتَس پٮ۪ٹھ بیٚیہِ زٕ سرکٲرِ مُلٲزِم نوکری نِش برطرف۔ یِم برطرفی آیہِ آییٖن کِس آرٹیکل 311 (2) (سی) تحت کرنہٕ، یُس ریاستٕچ سلامتی ہٕنٛدِ مفادَس منٛز انکوائری ورٲے برطرفی کرنُک اجازت چھُ دِوان۔ لیفٹیننٹ گورنر منوج سنہاہَن کٔر محکمہٕ تعلیمَس منٛز کٲم کرن وٲلۍ فرحت علی کھانڈے (رام بان، جوٚم) تہٕ محمد شفیع ڈار (بانڈی پورہ) دیہی ترقی محکمہٕ پٮ۪ٹھٕ برطرف ۔ ذرایعَو مُطٲبِق چھُ فرحت علی کھانڈے یَس پٮ۪ٹھ حزب المجاہدین باپتھ کٲم کرنُک الزام تہٕ اوس پنٕنۍ سرکٲرۍ نوکری ضِلعَس منٛز دہشت گردی زِندٕ کرنہٕ باپتھ ‘کور’ پٲٹھۍ استعمال کران۔ 2011 ہَس منٛز آو سُہ سیکورٹی فورسز ہٕنٛدِس زیرِ نگرٲنی منٛز یِنہٕ پتہٕ دہشت گردی ہٕنٛدِس مٲلی امدادَس منٛز ملوث آسنہٕ کِس الزامَس منٛز گرفتار کرنہٕ۔