اے آر ہِل، پلوامہ ہَس منٛز نامعلوم لاش لبنہٕ پتہٕ پولیس تفتیش شُروٗع۔ کشتواڑَس منٛز آٹو رکشہ حٲدثَس منٛز3 سَوارِ زخمی،یِم علاج باپتھ ہسپتال منتقل کرنہٕ آے۔

جنوٗبی پلوامہ ضِلعہٕ کِس اے آر پہٲڑی علاقَس منٛز اکھ نامعلوم لاش دریافت گژھنہٕ پتہٕ کٔر پولیسَن تفتیش شُروٗع۔ أتھۍ دوران گٔیہِ کشتواڑ کِس کارتھایی پادرَس منٛز أکِس آٹو رکشہٕ حٲدِثس منٛز کم از کم ترٛےٚ نَفر زخمی۔ تَفصیٖل دِنہٕ وٲلہِ سی این آیی ہٕنٛدِ نامہٕ نگارن ووٚن زِ پلوامہ کِس اے آر پہٲڑی علاقَس منٛز ٲس اکھ نامعلوم لاش لبنہٕ آمٕژ۔ حکامَو ووٚن زِ علاقَس منٛز نامعلوم لاشہِ ہِنٛز موٗجوٗدگی ہٕنٛز اطلاع موصول گژھنہٕ پتہٕ وٲژ اکھ پولیس ٹیم واقعہٕ جایہِ پٮ۪ٹھ تہٕ نِیُکھ لاش حراستَس منٛز۔ أکۍ سینئر پولیس افسرَن کٔر تصدیٖق زِ لاشہِ مُتعلِق اطلاع موصول گژھنہٕ پتہٕ آو یہِ حراستَس منٛز نِنہٕ تہٕ معاملٕچ تفتیش آیہِ شُروٗع کرنہٕ۔ أتھۍ دوران گٔیہِ کشتواڑ کِس کارتھایی پادر علاقَس منٛز أکِس آٹو رکشہ حٲدِثس منٛز کم از کم ترٛےٚ نَفر زخمی۔ ذٔرایعَو ووٚن زِ تمام زخمی ٲسِکھ طِبی علاج باپتھ منتقٕل کٔرمٕتۍ۔