موٗجوٗدٕ چیلنجَن سۭتۍ مُقابلہٕ کرنہٕ خٲطرٕ گژھہِ نیشنل کانفرنس مضبوٗط کرنہٕ یِنۍ: ڈاکٹر فاروق عبداللہ

سرینگر، 25 جولائی: جموں و کشمیر نیشنل کانفرنسٕکۍ صدر ڈاکٹر فاروق عبداللہَن ووٚن برٛسوارِ دۄہ زِ غٲر آئینی تہٕ غٲر جمہوری طریقہٕ سۭتۍ آئینی تہٕ جمہوری حقوق چھیننہٕ پتہٕ چھِ جموں و کشمیرٕک لوک پرٛٮ۪تھ سطحَس پٮ۪ٹھ محتاج بناونہٕ آمٕتۍ تہٕ تٲریٖخی ریاست بے اختیار بناونُک چھُنہٕ کانٛہہ تہِ موقعہٕ تراونہٕ یِوان۔ نیشنل کانفرنسٕچ طاقت چھِ مُقابلہٕ کرنہٕ خٲطرٕ واریاہ ضروٗری تہٕ اَمہِ خٲطرٕ چھُ اسہِ لوکَن ہُنٛد تعاون تہٕ تعاون حٲصِل کرنہٕ خٲطرٕ محنت سان کٲم کرٕنۍ۔
تٔمۍ کوٚر ییٚتہِ مندوبین خطاب کران یِمَن خیالن ہُنٛد اِظہار۔
ڈاکٹر فاروق عبداللہَن ووٚن زِ جموں و کشمیرَس پٮ۪ٹھ غٲر مقٲمی بیوروکریٹک نظام نافذ کٔرِتھ چھِ اتہِ کٮ۪ن لوٗکَن جموٗرِیَت نِش دوٗر تھاونہٕ آمٕتۍ، ییٚتہِ کۍ لوٗکھ چھِ 5 اگست 2019 پتہٕ ناانصافی ہُنٛد شکار تہٕ چھِنہٕ سرکٲرۍ سطحس پٮ۪ٹھ کٲنٛسہِ ہٕنٛدٮ۪ن کنن پٮ۪ٹھ رینگان۔تٔمۍ ووٚن زِ سانہِ یہِ تٲریٖخی حالت چھِ معٲشی بحالی ہٕنٛدِس وہرَس منٛز دِنہٕ یِوان، لوٗکَن چھنہٕ بُنیٲدی ضروٗرتہٕ یِتھ کٔنۍ زَن بجلی، آب تہٕ سڑکہٕ تام رسٲیی حٲصِل۔ یِمَن چیلنجَن سۭتۍ مُقابلہٕ کرنہٕ خٲطرٕ چھُ اسہِ اتحاد تہٕ اتفاق رائے ہٲوِتھ پنٕنۍ صفہٕ مضبوٗط کرٕنۍ۔
تٔمۍ ووٚن زِ نیشنل کانفرنس چھِ وٲحِد عوامٕچ نمایندٕ پارٹی یۄسہٕ لوکن موٗجوٗدٕ دلدل منٛزٕ نٮ۪بر نیرنٕچ صلٲحیت تھاوان چھِ تہٕ امہِ خٲطرٕ چھُ یہِ ضروٗری زِ پرٮ۪تھ سطحس پٮ۪ٹھ چھِ یہِ مٲلی پارٹی مضبوٗط کرٕنۍ۔
تٔمۍ دِیُت پارٹی رہنُماہن تہٕ عہدیدارَن زور زِ تِم کرَن نوجوانَن برٛونٛہہ کُن تِکیازِ نوجوانَن چھُ برٛونٛہہ کُن ذِمہٕ وٲری سمبھالٕنۍ۔