جوریان اکھنورَس منٛز ‘پی آئی اے’ نشان زد شَکاوَر غبارٕ لبنہٕ پتہٕ چھِ سیکورٹی ایجنسی ہوشیار

جموں و کشمیر کِس اکھنور کِس سرحدی گامَس منٛز گٔیہِ تشویش ہٕنٛز لہر ییٚلہِ مقٲمی لوٗکَو آسمانہٕ پٮ۪ٹھٕ اکھ مشکوک غبارٕ وُچھان یَتھ پٮ۪ٹھ انگریزی تہٕ اردو دۄشوٕنی زبانہِ منٛز واضح پٲٹھۍ ‘پی آئی اے’ لیٚکھِتھ اوس۔اطلاع موصول گژھنہٕ پتہٕ وٲتۍ پولیس تہٕ مُتعلقہٕ سیکورٹی ایجنسی واقعہٕ، تہٕ نیو غبارٕ پننِس تحویلَس منٛز، تہٕ علاقہٕ بنٛد کٔرِتھ کٔرٕکھ تلاشٕچ کاروٲیی شُروٗع۔ اِبتِدٲیی تاثرات مُطٲبِق چھُ یہِ غبارٕ پٲکِستٲنِس نژادُک باسان۔ تاہم، تمام پہلوون چھ باضابطہ طور پٲنٹھ جٲیزٕ یوان کرنہٕ۔تحقیقاتَو مُطٲبِق چھِ ٹیٖم یہِ طے کرنٕچ کوٗشِش کران زِ یہِ غبارٕ چھا سرحد اَپارِ منظم سرگرمی ہُنٛد حصہٕ یا ہوا کہِ لہرٕ کہِ وجہہ سۭتۍ چھُ یتہِ یور وسان ۔ تکنیکی مٲہِر چھِ غبارٕکۍ مواد، حرکتٕچ سمت تہٕ پرواز ہٕنٛز ممکنہٕ وتہِ ہُنٛد تجزیہٕ تہِ کران۔ذٔرایعَو ہُنٛد وَنُن چھُ زِ حالٕے دۄہَن منٛز سرحدی علاقَن منٛز مُختٔلِف مشکوک چیٖز برآمد گژھنہٕ پتہٕ چھِ سیکورٹی ایجنسی زِیٛادٕ ہوشیار گٔمٕژ، تہٕ اَتھ تناظرَس منٛز چھِ جورین سیکٹرَس منٛز نگرٲنی مٔزیٖد سخت کرنہٕ آمٕژ۔