گلوبل ساؤتھ پَزِ انسانیت کِس ترٛیٚیِمِس حِصس انصاف فراہم کرنہٕ خٲطرٕ اِکہٕ وٹہٕ گژھُن: وزیر اعظم نریندرمودی

نَیہِ دِلہِ: ؤزیٖر اعظم نریندر مودیَن دِیُت آز گلوبل ساوُتھ کٮ۪ن مُلکَن پٮ۪ٹھ زور زِ تِم کرَن ترقی سۭتۍ وابستہٕ پنٕنۍ وۄمیدٕ، خواہشات تہٕ ضرورتہٕ پوٗرٕ کرنہٕ خٲطرٕ یکوٹہٕ تہٕ پنٕنۍ صلاحیتہٕ تہٕ تجرُبہٕ شٲمِل کٔرِتھ انسانیت کِس زٕ تہائی حصس انصاف دِنہٕ۔
مسٹر مودیَن کٔر یہِ اپیل ترٛیٚیِمہِ وائس آف گلوبل ساوُتھ سمٹ کِس افتتاحی اجلاسس منٛز پنٛنِس تقریرَس منٛز۔
جناب مودیَن ووٚن زِ 140 کرور ہندوستٲنہِ طرفہٕ چھِ أسۍ ترٛیٚیِمہِ وائس آف گلوبل ساوُتھ سمٹَس منٛز پرٛٮ۪تھ أکِس گرمجوشی سان خیر مقدم کران۔ تٔمۍ ووٚن زِ پٔتِمٮ۪ن دۄن کانفرنسَن منٛز مِلیوٚو مےٚ تُہنٛدٮ۪ن واریٛاہَن سٲتھیَن سۭتۍ کٲم کرنُک موقعہٕ۔ مےٚ چھِ خۄش زِ ییٚمہِ ؤرۍ یہِ ہندوستانَس منٛز عام اِنتِخابات پتہٕ مِلٮ۪و مےٚ بیٚیہِ اکہِ لٹہِ یَتھ پلیٹ فارمَس پٮ۪ٹھ تۄہہِ سارِنٕے سۭتۍ رٲبطہٕ کرنُک موقعہٕ۔
"2022 ہَس منٛز، ییٚلہِ ہندوستانن جی-20 ہٕچ صدارت سمبھٲل، أسۍ اوس عزم کوٚرمُت زِ أسۍ کَرِ جی-20 نَیہِ شکٕل۔ وائس آف دی گلوبل ساؤتھ سمٹ بنیو اکھ یُتھ پلیٹ فارم یتہٕ اسہٕ ترقی سۭتۍ متعلق مسٲئلن تہٕ ترجیحاتن پیٹھ کھلہٕ کتھ باتھ کٔر۔