کولکتہ ڈاکٹر سٕنٛدِس عصمت دری تہٕ قتلہٕ کیسَس منٛز آیہِ سپریم کورٹَس منٛز عرضی دائر کرنہٕ۔

کولکتہ کِس آر جی کار میڈیکل کالجَس منٛز چھُ پوسٹ گریجویٹ ٹرینی ڈاکٹرس(پی جی ٹرینی ڈاکٹر) سۭتۍ عصمت دری تہٕ قتلُک ازخود نوٹس نِنہٕ خٲطرٕ چھےٚ سپریم کورٹَس منٛز اکھ عرضی دائر کرنہٕ آمٕژ۔چیف جسٹس ڈی وائی چندرچوڑَس لیکھنہٕ آمٕژ چِٹھہِ منٛز چھِ ڈاکٹر مونیکا سنگھ، بی ڈی ایس، آرمی کالج آف ڈینٹل سائنسز، سکندرآبادَن 9 اگست کولکتہ ہَس منٛز أکِس زنانہٕ ڈاکٹرَس سۭتۍ شرمناک واقعہٕ تہٕ 14 اگست آر جی کار میڈیکل کالجَس پٮ۪ٹھ حملٕچ منصفانہٕ تحقیقات کرنٕچ تہِ منٛگ کٔرمٕژ۔عرضی منٛز چھُ کولکتہ کِس أکِس کالجس منٛز طبی پیشہٕ ورَن پٮ۪ٹھ وحشیانہ حملَن ہٕنٛدۍ واریٛاہ واقعہٕ اجاگر کٔرمٕتۍ، ییٚتہِ ڈاکٹر سنگھَن ووٚن، "طبی پیشہٕ ورَن پٮ۪ٹھ وحشیانہ حملَن ہٕنٛدۍ حالٕے واقعہٕ چھِ نہٕ صرف اکھ ذٲتی المیہٕ، بلکہِ چھِ تِمَن لوٗکَن درپیش سنگین خطرَن ہٕنٛز یاد دِوان یِم جان بچاونہٕ خٲطرٕ انتھک محنت چھِ کران۔” اَمہِ سۭتۍ چھِ یِتھِس اہم شعبَس منٛز لوٗکَن ہٕنٛدِ حفاظتہٕ خٲطرٕ مزید خدشات پٲدٕ گژھان۔ ‘‘