ژورو نیشنل کانفرنس امیدوارَو کٔر راجیہ سبھا خٲطرٕ نامزدگی دٲخل

جموں و کشمیرَس منٛز راجیہ سبھا اِنتِخابس خٲطرٕ کٔر نیشنل کانفرنسٕک ژور امیدوارَو ژٔندٕروارِ دۄہ پنٕنۍ نامزدگی کاغذات دٲخل۔

گۄڈٕ گۄڈٕ کٔر سٲبقہٕ وزیر چودھری محمد رمضان، سٲبقہٕ وزیر مملکت، سجاد کچلو، تہٕ این سی خزانچی شامی اوبراے پنٕنۍ نامزدگی دٲخل ییٚلہِ زَن پارٹی ہُنٛد صوبہٕ ترجمان عمران نبی ڈار آو ٲخری امیدوار پٲٹھۍ پنٕنۍ نامزدگی جمع کرنہٕ خٲطرٕ۔

یِم وۄمیدوار چھِ راجیہ سبھا کٮ۪ن ژورَن سیٹَن باپتھ الیکشن لڑان، یِمَن خٲطرٕ اِنتِخابات 24 اکتوبر یِیہِ کرنہٕ۔