دربار موو بحال کرُن چھُ اکھ اصل قدم،جموں وکشمیرالگ کرنٕچ کوٗشِش گٔیہِ ناکام: ڈاکٹر فاروق عبداللہ

نیشنل کانفرنسٕکۍ صدر تہٕ سٲبقہٕ ؤزیٖرِ اعلیٰ ڈاکٹر فاروق عبداللہ ہَن ووٚن زِ دربارٕچ بَحٲلی چھُ اکھ اصل قدم، تہٕ اَمہِ سۭتۍ چھےٚ جموں و کشمیر الگ کرنٕچ کوٗششہِ ناکام گٔمٕژ۔ تٔمۍ ووٚن زِ دربٲرۍ اقدام سۭتۍ میلہِ جموں کِس معاشیاتس واریاہ فٲیدٕ۔ صدرَن کوٚر ژٔندٕروارِ دۄہ یَتہِ صحافیَن ہٕنٛدٮ۪ن سوالَن ہُنٛد جواب دِوان یِمَن خیالاتَن ہُنٛد اِظہار۔

تٔمۍ ووٚن، ‘بہٕ چُھس خوش زِ دربارٕچ حرکتِ روایت چھےٚ بحال گٔمٕژ۔ اَمہِ سۭتۍ گٔیہِ جموں و کشمیر الگ کرنٕچ کوٗششہِ ناکام۔ بہٕ چھُس وۄمید کَران زِ اَمہِ سۭتۍ میلہِ جموں کِس معاشِیاتس واریاہ فٲیدٕ۔’

تٔمۍ ووٚن بیٚیہ، ‘یہِ ٲس مہاراجہ رنبیر سنگھ سٕنٛز اکھ اصل پہل ۔ اَمہِ رٮ۪وایتہٕ ذٔریعہٕ ٲسۍ جموں و کشمیرٕکۍ لوٗکھ فرقہٕ یا فرقہٕ ورٲے اکھ أکِس مانان۔