کٔشیٖرِ تہٕ جۅم صوبہٕ کٮ۪ن ونٹر زون علاقَن منٛز دٔہمہِ جمٲژ ہُنٛد سالانہٕ امتحان شروع

تمام اِنتِظامَن درمیان گوٚۅ دٔہمہِ جمٲژ ہُنٛد سالانہٕ امتحان از ژٔندٕروارِ دۄہ وادی کشمیر تہٕ جۅم صوبہٕ کٮ۪ن ونٹر زون علاقَن منٛز شُروٗع۔ حُکامَو مُطٲبِق چھِ لَگ بَگ 95,000 طٲلبہِ عٔلِم اتھ امتحانس منٛز حصہٕ نِوان، یِمَن خٲطرٕ چھِ 994 امتحانی مرکز قٲیِم کرنہٕ آمٕتۍ۔ جموں و کشمیر بورڈ آف سکول ایجوکیشن کِس أکِس بیانَس مُطٲبِق چھُ امتحانُک وقت صبحٲے 11 بجے پٮ۪ٹھہٕ دُپہرٕ 2 بجے تام۔ کُل 94,783 طالب علمَن منٛز چُھ 68,804 طٲلبِ علمن ہُنٛد تعلُق کٔشیٖرِ ہٕننٛدٮ۪ن 10 ضِلعن سۭتۍ، ییٚلہِ زَن 25,224 طٲلبہِ عٔلِم چھِ صوبہٕ جموں کٮ۪ن 8 ضِلعن سۭتۍ تعلُق تھاوان۔ اَمہِ علاوٕ چھِ اَتھ امتحانَس منٛز کرگِل ضِلعٕک 660 طٲلبہِ عٔلِم تہٕ لداخ کِس مرکٔزی زیر انتظام علاقَس منٛز لیہہ ضِلعٕک 95 طٲلبہِ عٔلِم تہِ حصہٕ نِوان۔ صُبحہ پیٹھٕ آیہِ دٔہمہِ جمٲژ ہٕنٛدۍ طٲلبہِ عٔلِم وادی منٛز پننٮ۪ن متعلقہٕ امتحانی مرکزن کُن پَکان وٕچھنہٕ۔ أکۍ طالبہِ علمَن ووٚن پننِس امتحانی مرکزَس نٮ۪برٕ کنہِ میڈیاہَس زِ: ‘امتحانُک خوف چھُ یقینا، مگر مےٚ چھِ پننہِ طرفہٕ تمام مُمکِن تیٲری کٔرمٕژ تہٕ وۄمید چھےٚ زِ بہٕ کرٕ اصل کارکردٕگی ہُنٛد مظٲہرٕ’۔