جوٚمِس منٛزڈیلی ویجر مزدورَن ہُنٛد احتجاج، سِول سیکرٹریٹس کُن مارچ سپُد ناکام۔

ژٔنٛدٕروارِ دۄہ کٔر جموَس منٛز ڈیلیویجرو نوکری ہٕنٛدِ مُطالبہٕ خٲطرٕ اکھ بٔڑِس احتِجاج تہٕ کٔرٕکھ سِول سیکریٹریٹَس کُن پیش قدمی کرنٕچ کوٗشش۔ تاہم رُکٲوۍ پولیسَن تِہٕنٛز پیش قدمی۔ احتِجاجَس دوران کٔر مُظٲہِرین حکوٗمتَس خٕلاف نعرٕ بٲزی، یہِ الزام لگٲوِتھ زِ تِم چھِ ؤری وادَو پٮ۪ٹھٕ اپزۍ وعدَن ہِنٛدِس بُنیادَس پٮ۪ٹھ تھاونہٕ آمٕتۍ، ییٚلہِ زَن یِہنٛدِ مُطالبات پوٗرٕ کرنہٕ خٲطرٕ چھُنہٕ کانٛہہ ٹھوس قدم تُلنہٕ آمُت۔
احتجاج کَرن والٮ۪و مُلٲزِمَو ٲسۍ مُختٔلِف بینر تہٕ پلے کارڈ تُلِتھ یِمَن پٮ۪ٹھ ‘أسۍ چھِ انصاف یژھان’، ‘کانٛہہ وعدٕ چھُنہٕ، مُستقل نوکری یژھان’ تہٕ ‘دۄہ دِنہٕ والٮ۪ن خلاف ناانصافی رُکاونہٕ’۔نعرٕ لٮ۪کھِتھ ٲسۍ مُظٲہِرینو لگوو اِلزام زِ حکوٗمتَن چھُ تِمَن بار بار پنٕنۍ مسلہٕ حل کرنُک یقین دِژمُت، مگر آز تام گوٚو نہٕ کانٛہہ تہِ وعدٕ پوٗرٕ ۔
أکۍ احتجاجی مُلٲزِمن محمد الیاسَن ووٚن زِ أسۍ چھِ پٔتِمٮ۪و پنٛدہَو پٮ۪ٹھٕ وُہَو ؤریَو پٮ۪ٹھ محکمَن منٛز دۄہ رات کٲم کران، توتہِ چھےٚ سانہِ قۄربٲنی تسلیم کرنہٕ بجایہِ صرف کمیٹیہِ بناونہٕ یِوان۔ اسہِ چُھ وۄنۍ کمیٹین ہٕنٛدِس ناوس پیٹھ دھوکہٕ دِنہٕ یوان۔