اننت ناگس منٛز بٔڑِس پیمانس پٮ۪ٹھ تلٲشی کاروٲیی جٲری۔

امن و امان برقرار تھاونہٕ تہٕ حِفٲظتی گرڈ مٔزیٖد مضبوٗط کرنٕچ جٲری کوٗشِشن منٛز کوٚر اننت ناگ پولیسَن ژٔنٛدٕروارِ دۄہ واریاہَن مقامَن پٮ۪ٹھ گیرٕ تہٕ تلٲشی کاروٲییہِ ۔ یِم کاروٲییہِ چھےٚ قومی خٕلاف سرگرمیَن، ملی ٹنٹ تنظیمن ہٕنٛدۍ نیٹ ورک، تہٕ غٲر قونوٗنی سرگرمیَن منٛز شٲمِل لبنہٕ یِنہٕ والٮ۪ن عناصرن خٕلاف جٲری کریک ڈاونُک حصہٕ۔
پُلیٖس مُطٲبِق ترٛٲوۍ پُلسہٕ ٹیٖمو حِفٲظتی دستَن سان لال چوک، اننت ناگ تہٕ ضِلعہٕ جیل کہری بِل کِس نزدیٖکی علاقَن منٛز بٔڑِس پٲمانَس پٮ۪ٹھ چھاپہٕ۔ کاروٲیی دوران آیہِ واریاہَن شَکاوَر مقامَن ہٕنٛز تلٲشیہِ کرنہٕ تہٕ واریاہَن نفرَن ہٕنٛز شناختٕچ تصدیق کرنہٕ۔
پُلیٖس ذرایعَو ووٚن زِ یِمَن کاروٲیِیَن ہُنٛد مقصد چھُ قوم مخٲلِف عناصرن ہِنٛزن سرگرمیَن پٮ۪ٹھ نظر تھاوٕنۍ، شَکاوَر حرکتَن پیٹھ نظر تھاوٕنۍ تہٕ امن و امان برقرار تھاوُن۔
پننِس بیانَس منٛز ووٚن اننت ناگ پولیسَن زِ ‘عوٲمی تحفظ یقینی بناونہٕ تہٕ علاقَس منٛز پایدار امن قٲیِم کرنہٕ خٲطرٕ روزِ امہِ قٕسمٕچ کاروٲیی مستقبلَس منٛز منظم تہٕ مربوط اندازَس منٛز جٲری۔’