اِمِگریشن اینڈ فارنرز ایکٹ 2025 خٕلاف ورزی باپتھ اننت ناگَس منٛز ہوٹلَس خٕلاف ایف آئی آر درٕج : پُلیٖس

اننت ناگ پولیسَن چُھ پہلگام علاقَس منٛز أکِس ہوٹلَس خٕلاف امیگریشن اینڈ فارنرز ایکٹ 2025 خٕلاف ورزی کٔرِتھ دۄن غٲر مُلکی شہریَن ہٕنٛدِ روزنٕچ اطلاع دِنس منٛز ناکام روزنَس پٮ۪ٹھ مقدمہٕ درٕج کوٚرمُت۔
پُلسہٕ ترجمانَن ووٚن زِ رافٹنگ پوائنٹ علاقَس منٛز ہوٹلَن تہٕ پژھٮ۪ن ہِنٛزِ رہٲیشہِ ہِنٛدِس معموٗلَس دوران کٔر پہلگام پُلیٖس تھانہٕ چہِ أکہِ پُلیٖس پارٹی قونوٗنی تہٕ حِفٲظتی قٲیدٕچ تعمیل یقینی بناونہٕ خٲطرٕ چیکنگ۔
تٔمۍ ووٚن زِ معٲینس دوران آو یہِ وُچھنہٕ زِ تھائی لینڈٕکۍ زٕ غٲر مُلکی شہری ٲسۍ گولڈن ہیریٹیج ہوٹل، رافٹنگ پوائنٹ، آرورَس منٛز روزان۔
تٔمۍ ووٚن: ‘ہوٹل انتظامیہن تُھوو زٲنِتھ مٲنِتھ یِہُنٛد روزُن ژوٗرِ تہٕ روٗدۍ لٲزمی فارم سی آن لایِن جمع کرنس منٛز ناکام، یُس غٲر مُلکی شہریَن ہِنٛدِ یِنہٕ تہٕ رجسٹریشن باپتھ ضروٗری چھُ۔’
پُلسہٕ ترجمانَن ووٚن زِ یہِ چھےٚ امیگریشن اینڈ فارنرز ایکٹ، 2025 کٮ۪ن دفعاتن ہٕنٛز واضح خلاف ورزی یَتھ منٛز ہوٹلَن تہٕ رہٲیشی ادارن ہٕنٛدِ طرفہٕ غٲر مُلکی پژھٮ۪ن ہٕنٛز اطلاع دِنُک ضروٗرت چھےٚ۔