جمہوریتَس منٛز ہیکَو نہٕ پُرامن احتجاج رُکٲوِتھ: تنویر صادق

نیشنل کانفرنسٕکۍ سینئر ترجمان، تہٕ ایم ایل اے زیڈ ڈی بل، تنویر صادقَن ووٚن ژٔندٕروارِ دۄہ زِ پُرامن احتجاجَس دوران طٲلبہِ عٔلِم تہٕ باقٕے رُکاوُن چھُ غلط، تِکیازِ جموٗرِیَتَس منٛز چھُ پرٮ۪تھ شہریَس پُر امن اندازَس منٛز پنٕنۍ آواز تُلنُک حق حٲصِل۔ سرینگرَس منٛز میڈیاہَس سۭتۍ کَتھ باتھ کٔرِتھ ووٚن تٔمۍ زِ حکوٗمتَن اوس گۄڈَے یِمَن طٲلبہِ عٔلِمَن احتجاج کرنُک اِجازت دِژمُت، اَمی مۄکھٕ چھُنہٕ یمہِ لٹہِ یِم رُکاونُک کانٛہہ وجہ۔ تنویر صادق سندِ مُطٲبِق چھُ پُرامن احتجاج اکھ جمہوری حق تہٕ پرٛٮ۪تھ کٲنٛسہِ گژھہِ یہِ حق دِنہٕ یُن۔ راتھ یُس سپدیوو سہ اوس نہٕ صحیح۔ رِزرویشن پالیسی مُتعلِق کتھ کٔرِتھ ووٚن تٔمۍ زِ حکوٗمتَن چھُ سُہ طٔریٖقہٕ کار پاننٲومُت ییٚمیُک وعدٕ پارٹی منشورَس منٛز اوس کرنہٕ آمُت۔ تٔمۍ دِژ اطلاع زِ أکۍ کمیٹی کٔر اَتھ معاملَس پٮ۪ٹھ شیٚن رٮ۪تَن کٲم، اکھ رپورٹ تیار، کابینہٕ ہیوٚت قونوٗنی راے حٲصِل، تہٕ پتہٕ سوُزُکھ رپورٹ منظوٗری خٲطرٕ لوک بھون۔ تٔمۍ ووٚن، ‘اگر کانٛہہ تبدیلی آسہِ، أسۍ کٔرِو طالبہِ علمَن پانہٕ اطلاع۔ کانٛہہ تہِ تبدیلی آیہ نہٕ کرنہٕ۔ أسۍ چھِ بلکل یُس کران چھِ’۔