شوپیان سائبر پولیسَن کٔر ییٚمہِ ؤرۍ یہِ سائبر فراڈ کیسَن منٛز 6.32 لَچھ رۄپیہِ برآمد

شوپیان سائبر پولیس سٹیشنَن کٔر ییٚمہِ ؤرۍ یہِ سائبر فراڈ کٮ۪ن مُختٔلِف معاملَن منٛز مُتٲثریٖنَن نِش لوُٹنہٕ آمٕتۍ 6,322,792 رۄپیہِ برآمد تہٕ مُتعلقہٕ قونوٗنی تہٕ عدالتی طٔریٖقہٕ کار پوٗرٕ کرنہٕ پتہٕ چھِ یہِ مُتٲثِریٖنَن واپس دِنہٕ آمٕتۍ۔ پُلسہٕ مُطٲبِق چھِ یہِ کامیٲبی بروقت کارروائی، پیشہٕ ورانہٕ تحقیقات، تہٕ تکنیکی وسٲیلَن ہٕنٛدِ موثر استعمالُک نتیجہٕ۔ رِپورٹَس منٛز چھُ وونمُت زِ شوپیان سائبر پولیسَس آیہِ یو پی آٮٔی فراڈ، سوشل میڈیا سکیمَن، نقلی قرضٕچ درخواست، او ٹی پی یَن ہُنٛد غلط استعمال، تہٕ باقٕے مٲلی سائبر جُرمَن مُتلِق واریاہ شِکایات۔ شِکایَت موصول گژھنہٕ پتہٕ آیہِ فوری کاروٲیی کرنہٕ، تہٕ تکنیکی تہٕ ڈیجیٹل ٹولَن ہٕنٛدِ مدتہٕ سۭتۍ آیہِ تفتیش برٛونٛہہ کُن پکناونہٕ۔ بینکَن تہٕ مٲلی اِدارَن سٕتہِ بروقت مُداخلت تہٕ قریبی تال میل کہِ وجہ سٕتہِ آیہِ واریاہ مشکوک لین دین اہم مرحلَن پیٹھ منجمد کرنہٕ، یِمو نہ صرف مزید مٲلی نۄقصان رُکٲوِتھ بلکہِ مُتٲثریٖنَن ہُنٛد پونٛسہٕ واپس کرُن تہِ مُمکِن گوٚو۔