شیٖن تہٕ روٗدٕچ پیشن گویی دوران گٔیہِ کٔشیٖرِ منٛز ونٛدٕچ شدت رژھ کھنڈ کم

وادی کشمیرَس منٛز یِنہٕ والٮ۪ن دۄن دۄہَن دوران شیٖن تہٕ روٗد پیٚنٕچ پیشن گوئیَن درمیان چھُ زیادٕ تر جاین رٲژ ہُنٛد درجہٕ حرارت لٔگِتھ لٔگِتھ رِکارڈ کوٚرمُت، ییٚمہِ سۭتۍ لوٗکَن چھِ تیز سردی نِش کینٛہہ راحت میلان۔ کٔشیٖرِ موسمہٕ مُطٲبِق آو رٮ۪تہٕ کالہِ دارالحکوٗمت سری نگرَس منٛز کم از کم درجہٕ حرارت 1.0 ڈگری سیلسیس ریکارڈ کرنہٕ، ییٚلہِ زَن 28 نومبر آو موجودٕ موسمٕچ سارِوٕے کھۄتہٕ سرد رٲژ ریکارڈ کرنہٕ یَتھ منٛز رٲژ ہُنٛد درجہٕ حرارت منفی 4.5 ڈگری سیلسیس تام کم گوٚو۔ وادی ہٕنٛدٮ۪ن مشہوٗر سیاحتی مقامات، گُلمرگ تہٕ پہلگامَس منٛز آو کم از کم درجہٕ حرارت بِلترتیب منفی 1.6 ڈگری سیلسیس تہٕ منفی 1.2 ڈگری سیلسیس ریکارڈ کرنہٕ۔ سرحدی ضِلعہٕ کُپواڑہَس منٛز اوس کم از کم درجہٕ حرارت 2.0 ڈگری سیلسیس، ییٚلہِ زَن قاضی گُنٛڈ شَہرَس منٛز، یَتھ کٔشیٖرِ ہُنٛد دروازٕ ونان چھِ، کم از کم درجہٕ حرارت آو 1.4 ڈگری سیلسیس ریکارڈ کرنہٕ۔ وسطی کٔشیٖرِ منٛز آو بڈگام تہٕ گندر بل ضِلعن منٛز کم از کم درجہٕ حرارت بِلترتیب 1.2 ڈگری سیلسیس تہٕ 1.8 ڈگری سیلسیس ریکارڈ کرنہ