جموں و کشمیر کٮ۪ن واریاہَن ضِلعن منٛز وی پی این ہٕنٛدِس استعمالَس پیٹھ پابٔنٛدی.

سیکورٹی خدشاتَو کِنۍ چھِ چوکسی منٛز اضافہٕ جموں و کشمیر کٮ۪ن واریاہَن ضِلعن منٛز چھُ ورچوئل پرائیویٹ نیٹ ورکس (وی پی این) ہٕنٛدِس استعمالَس پیٹھ پوٗرٕ پابٔنٛدی لگاونہٕ آمٕژ۔ حکامَو چھُ اَمہِ فٲصلٕچ بُنیاد پٲٹھۍ سیکورٹی خدشات، شَکاوَر انٹرنیٹ سرگرمیہِ، تہٕ امن و امان خٲطرٕ مُمکِنہٕ خطرَن ہُنٛد حوالہٕ دِیُتمُت۔ اَمہِ پابٔنٛدی پتہٕ چھِ واریاہَن ضِلعن منٛز پُلیٖس تہٕ باقٕے حِفٲظتی ایجنسیَو موبایِل فونَن ہِنٛز نگرٲنی تیز کٔرمٕژ تاکہِ یہِ یٔقیٖنی بناونہٕ یِیہِ زِ حُکمٕچ خٕلاف ورزی گژھِ نہٕ۔ وادی ہٕنٛدیو کُپواڑہ، کُلگام تہٕ شوپیان ضِلعن چھِ تازٕ ترین نوٹیفکیشن جٲری کٔرمٕتۍ یَتھ منٛز وی پی اینَن ہُنٛد استعمال منع قرار دِنہٕ آمُت۔ حکامَو چھُ واضح کوٚرمُت زِ نافرمانی ہٕنٛدِس صوٗرتس منٛز یِیہِ سخٕت قونوٗنی کاروٲیی کرنہٕ۔ کُپواڑہ ڈِسٹرکٹ مجسٹریٹ شری کانت بالا سٕنٛدِ جٲری کَرنہٕ آمتِس حُکمَس منٛز چھُ پولیسَس مِلنہٕ آمٕتۍ رپورٹَن ہُنٛد حوالہٕ دِنہٕ آمُت یِمَن منٛز ضِلعَس منٛز ‘شَکاوَر انٹرنیٹ صارفینَن’ ہٕنٛدِ دٔسۍ وی پی این ہٕنٛدِس بڑوٕنِس استعمالَس پٮ۪ٹھ تشویشُک اظہار چھُ آمُت کرنہٕ۔ حُکمَس منٛز چھُ وننہٕ آمُت زِ وی پی این خٕدمَتَن چھِ غٲر قونوٗنی سرگرمیَن، اشتعال دِنہٕ، گمراہ کن موادٕ پھٔہلاوَن تہٕ امن خلل تراونہٕ باپتھ استعمال یِوان کرنہٕ۔