کٔشیٖرِ منٛز رٲژ ہُنٛد درجہٕ حرارت نِشانہٕ کھۄتہٕ بۄن ، ونٛدٕ پوٗرٕ زورٕ سان جٲری۔

وادی کٔشیٖرِ منٛز چھُ سردی موسم برقرار تِکیٛازِ رٲژ ہُنٛد درجہٕ حرارت چھُ لگاتار منجمد جایہِ کھۄتہٕ بۄن روزان، ییٚمہِ کِنۍ وادی ہٕنٛدٮ۪ن روزَن والٮ۪ن چھِ مُختٔلِف مسلہٕ تہٕ مُشکِلاتن ہُنٛد سامنہٕ کرُن۔
کشمیر موسمہٕ مُطٲبِق چھُ وسطی کشمیرُک سیاحتی مقام سونمارگ تہٕ جنوٗبی کشمیرُک شوپیاں ضِلعہٕ وادی ہُنٛد سارِوٕے کھۄتہٕ سرد علاقہٕ، ییٚتہِ کم از کم درجہٕ حرارت منفی 5.5 ڈگری سیلسیس ریکارڈ آو کرنہٕ۔
وادی ہٕنٛدٮ۪ن مشہوٗر سیاحتی مقامَن گُلمرگ تہٕ پہلگامَس منٛز آو رٲژ ہُنٛد درجہٕ حرارت بِلترتیب منفی 5.0 ڈگری سیلسیس تہٕ منفی 3.8 ڈگری سیلسیس ریکارڈ کرنہٕ۔
جموں و کشمیرٕچ رٮ۪تہٕ کالہِ رازدٲنی سرینگرَس منٛز آو کم از کم درجہ حرارت منفی 2.4 ڈگری سیلسیس ریکارڈ کرنہٕ۔
سرحدی ضِلعہٕ کُپواڑہَس منٛز اوس رٲژ ہُنٛد درجہٕ حرارت منفی 3.0 ڈگری سیلسیس، ییٚلہِ زَن کٔشیٖرِ ہٕنٛدِ دروازٕ کہِ ناوٕ سۭتۍ مشہوٗر قصبہٕ قاضی گُنڈَس منٛز اوس کم از کم درجہٕ حرارت منفی 3.3 ڈگری سیلسیس ریکارڈ کرنہٕ آمُت۔
جٔنوٗبی کٔشیٖرِ ہِنٛدٮ۪ن ضِلعن اننت ناگ تہٕ پلوامہ ہَس منٛز آو رٲژ ہُنٛد درجہٕ حرارت بِلترتیب منفی 4.2 ڈگری سیلسیس تہٕ منفی 4.9 ڈگری سیلسیس ریکارڈ کرنہٕ۔