بارہمولہ حملہٕ: بوٹا پتھری علاقَس منٛز چھِ بٔڑِس پٲمانَس پٮ۪ٹھ تلاشی آپریشن جٲری۔

برٛیسوارِ دۄہ شامَس چھُ شُمٲلی کشمیر کِس بارہمولہ ضلعہٕ کِس بٹا پاتھری علاقَس منٛز دہشت گردَو فوج کِس قافلَس پٮ۪ٹھ حملہٕ کرنہٕ پتہٕ بٔڑِس پیمانَس پٮ۪ٹھ تلاشی مہم جٲری۔
سرینگر: شُمٲلی کشمیر کِس بارہمولہ ضلعہٕ کِس بوٹا پاتھری علاقَس منٛز برٛیسوارِ دۄہ شامَس ملی ٹنٹوفوجی گاڑِ پٮ۪ٹھ حملہٕ کٔرِتھ زٕ مقٲمی قُلی تہٕ زٕ فوجی ہیتھ ژور نفر ہلاک تہٕ ترٛےٚ فوجی اہلکار زخمی گٔمٕتۍ۔ یہِ واقعہٕ گوٚو گلمرگ کِس ناگِن دھوک بوٹا پاتھری منٛز لائن آف کنٹرول (ایل او سی) نزدیٖک فوج کِس آر آر کے یونٹ کِس قافلَس نشانہٕ بناوان۔ مارنہٕ آمتین جوانَن ہٕنٛز شناختُک چھُنہٕ وُنیُک تام پتہ لگاونہٕ آمُت، ییٚلہِ زَن قُلیَن ہٕنٛز شناخت چھِ مشتاق احمد تہٕ ظہور احمد ناوٕ سۭتۍ کرنہٕ آمٕژ، یِم بنیار بارہمولہٕکۍ روزَن وٲلۍ چھِ۔
سرکٲرِ ذٔرایعن ووٚن زِ حملہٕ پتہٕ کٔر حِفاظتی فوجن علاقَس منٛز حملہٕ آورَن ہُنٛد پتہ لگاونہٕ خٲطرٕ بٔڑِس پیمانَس پٮ۪ٹھ تلاشی مہم شروع، یُس وُنہِ تہِ جٲری چھُ۔ تٔمۍ ووٚن زِ تلاشی آپریشن مؤثر بناونہٕ خٲطرٕ چھِ علاقَس منٛز فوجٕچ اضٲفی کمک تعینات کرنہٕ آمٕژ۔