پی ڈی پی یَن کوٚر پارٹی ہُنٛد پوٗرٕ ڈھانچہٕ تحلیل۔

جموں و کشمیرس منٛز حالٕے اسمبلی اِنتِخابس منٛز پننہِ شکستہِ ہُنٛد جٲیزٕ نِنہٕ پتہٕ کینٛہہ دۄہ پتہٕ کوٚر پی ڈی پی یَن پارٹی ہُنٛد پوٗرٕ ڈھانچہٕ فوری اثر سۭتۍ تحلیل۔ أکِس بیانَس منٛز ووٚن پی ڈی پی یَن زِ پارٹی ڈھانچہٕ تحلیل کرنُک فٲصلہٕ اوس پارٹی صدر محبوبہ مفتی یَن کوٚرمُت۔ پارٹی ووٚن زِ یِنہٕ وٲلِس مُستقبِلس منٛز یِن پارٹی ہٕنٛدٮ۪ن سینئر رہنُماہن سۭتۍ مشورٕ کرنہٕ پتہٕ نٔوۍ عہدیدار، مُختٔلِف وِنٛگ تہٕ اِدارٕ بناونہٕ۔
پی ڈی پی یَس ٲس جموں و کشمیرَس منٛز حالٕے اسمبلی اِنتِخابس منٛز بٔڑ شِکست دِژمٕژ تہٕ زیٖنِن صِرِف ترٛےٚ سیٹہٕ۔ یہِ اوس 25 ؤرۍ یَو پتہٕ پارٹی خٲطرٕ بدترین اِنتِخابی نٔتیٖجہٕ۔ 2014 کِس اسمبلی اِنتِخابس منٛز ٲس پی ڈی پی یَن 28 سیٖٹہٕ زیٖنمٕژ تہٕ اُبرٮ۪و وٲحِد سارِوٕے کھۄتہٕ بٔڑ پارٹی۔