جمہِ کِس اکھنور علاقَس منٛز ملی ٹنٹن ہُنٛد فوجی گاڑِ پٮ۪ٹھ حملہٕ، تلٲشی مہم چھِ جٲری۔

جموں کِس اکھنور علاقس منٛز ژٔنٛدٕروارِ دۄہ صُبحٲے کوٚر مشتبہ ملی ٹنٹنو لائن آف کنٹرول (ایل او سی) سۭتۍ فوجی ایمبولینسَس پٮ۪ٹھ حملہٕ، ییٚمہِ سۭتۍ سیکورٹی فورسَن علاقَس گیرٕ بٔنٛدی کٔرِتھ تلاشی مہم شروع۔
سرکٲرِ ذٔرایعو ووٚن زِ مشتبہ ملی ٹنٹنو کوٚر ژٔنٛدٕروارِ دۄہ صبحٲے 6 بجہِ جموں کِس اکھنوٗر کِس جوگون پٹن علاقس منٛز فوجی ایمبولینسَس پٮ۪ٹھ گولہِ چلٲوِتھ حملہٕ۔
تٔمۍ ووٚن زِ فوجی جوانَو دِیُت پوزیشنہٕ نِتھ جواب۔
تٔمۍ ووٚن زِ واقعہٕ پتہٕ کوٚر سیکورٹی فورسَن پوٗرٕ علاقَس گیرٕ تہٕ کٔرٕن تلاشی آپریشن شروع۔
ذٔرایعن ووٚن زِ دۄشوٕنی طرفن درمِیان چھِ گولہٕ بٲری رُکنہٕ وِزِ جٲری۔
وننہٕ چھُ یِوان زِ زٕ پٮ۪ٹھ ترٛےٚ دہشت گرد چھِ گیرٕ بٔنٛدی منٛز پھٔسِتھ۔