کٔشیٖرِ منٛز سرد ونٛدٕ جٲری، پہلگام سارِوٕے کھۄتہٕ سرد جاے درج۔

وادی کٔشیٖرِ منٛز سرد ونٛدٕچ حالت چھِنہٕ رُکاونُک ناو نِوان تِکیٛازِ خۄشٕک موسمَس منٛز چھُ رٲژ ہُنٛد درجہٕ حرارت منجمد نقطہٕ کھۄتہٕ واریاہ کم ریکارڈ کرنہٕ آمُت۔
موسمیات محکمہٕ مُطٲبِق چھُنہٕ 19 جنؤری تام وادی منٛز موسمَس منٛز کانٛہہ تہِ بٔڑ تبدیلی ہُنٛد کانہہ امکان۔
مُتعلقہٕ محکمہٕ کِس ترجُمانَن ووٚن زِ 19 جنؤریَس تام چھُنہٕ وادی منٛز کانٛہہ تہِ بٔڑ تبدیلی ہُنٛد اِمکان، امہِ علاوٕ زِ 16 جنوری صُبحٲے چھُ وادی کٮ۪ن پہٲڑی علاقَن منٛز ہلکہٕ شین پینُک امکان۔
تٔمۍ ووٚن زِ پتہٕ چھُ 21 تہٕ 22 جنوری وادی منٛز ہلکہٕ شین پینُک امکان۔
دوٚیمہِ طرفہٕ چھُ وادی منٛز رٲژ ہِنٛدِس درجہٕ حرارتس منٛز معموٗلی بہتری باووٚجوٗد سرد ونٛدٕ جٲری۔
رٮ۪تہٕ کٲلِچ رازدٲنہِ سری نگرَس منٛز چھُ کم درجہ حرارت منفی 4.2 ڈگری سیلسیس ریکارڈ کرنہٕ آمُت، یُس پٔتمہِ رٲژ منفی 5.5 ڈگری سیلسیس کم اوس۔