حکومت ہیٚکہِ نہٕ گلمرگ فیشن شوس ذٲتی معاملہٕ ؤنِتھ پننہِ ذمہٕ دٲری نِش آزاد گٔژِھتھ: محبوبہ مفتی

پی ڈی پی صدر تہٕ سٲبقہٕ وزیر اعلیٰ محبوبہ مُفتیَن ووٚن زِ حکومت ہٮ۪کہِ نہٕ گلمرگ فیشن شو اکھ ذٲتی معاملہٕ قرار دِتھ پنٕنۍ ذمہٕ دٲری نِش آزاد کٔرِتھ۔ تٔمۍ ووٚن زِ "احتساب نِش دور گژھنہٕ سۭتۍ ہیٚکہِ یِتھۍ مزید واقعاتن ہٕنٛز وتھ ہموار گژھِتھ یِم سانہِ ثقافت تہٕ معاشرس سنگین نۄقصان واتنٲوِتھ۔”
سٲبقہٕ وزیر اعلیٰ سُنٛد بیان آو وزیر اعلیٰ عمر عبداللہ سٕنٛدِ ژٔنٛدٕروارِ دۄہ اسمبلی منٛز واضح کرنہٕ پتہٕ زِ گلمرگ شوَس منٛز چھُنہٕ حکوٗمتُک کانٛہہ تہِ کردار۔ ‘ایکس’ پٮ۪ٹھ أکِس پوسٹَس منٛز ووٚن محبوبہ مُفتیَن زِ "گلمرگَس منٛز منعقد گژھَن وٲلۍ حالٕے فیشن شوٕچ فحش تصویٖرٕ وُچھُن چھُ سٮ۪ٹھاہ پریشان کرن وول، درحقیقت، اکھ واقعہٕ یُس رمضان کِس مُقدس رٮ۪تس منٛز اکھ ناشائستہ تماشہٕ بنیومُت اوس، یہِ چھُنہٕ دۄکھٕ سۭتۍ کم۔” تٔمۍ ووٚن زِ "یہِ چھُ افسوسناک زِ نجی ہوٹل والٮ۪ن چھُ یِمَو واقعاتو ذٔریعہٕ فحاشی فروغ دِنُک اِجازت دِنہٕ یِوان یِم سانٮ۪ن ثقافتی اقدارَن سۭتۍ پوٗرٕ تضادَس منٛز چھِ”۔