کٔشیٖرِ منٛز چُھ سیٚٹھاہ روٗد جٲری، گُلمرگہِ منٛز تازٕ شیٖن۔

محکمہ موسمیات چہِ پیشن گویی مُطٲبِق چھُ سری نگرَس سۭتۍ وادی کشمیر کٮ۪ن مٲدٲنی علاقَن منٛز پٔتمہِ ژورَو دۄہَو پٮ۪ٹھٕ وقفہٕ وقفہٕ سۭتۍ روٗد پٮ۪وان، ییٚلہِ زَن سیاحتی مُقام گلمرگ ہٮ۪تھ کینٛہہ پہٲڑی علاقَن منٛز چھُ پٔتمہِ 24 گھنٹَن دوران تازٕ شیٖن پیومُت۔

مُتعلقہٕ محکمہٕ کِس ترجُمانَس مُطٲبِق چھُ وادی منٛز ییٚمہِ ہفتہٕ کِس ٲخرَس تام یِتھۍ موسمی حالات جٲری روزنُک امکان۔

أتھہِ دوران روٗد سِریٖنَگرَس منٛز پٔتِمٮ۪ن 24 گٲنٛٹن منٛز 10.6 ملی میٹر روٗد رِکارڈ، ییٚلہِ زن کُپواڑہ کِس سرہاڈی ضِلعس منٛز اتھ وقتس دوران 9.1 ملی میٹر روٗد رِکارڈ کرنہٕ آمُت۔