سٮ۪ٹھاہ خراب موسمی حالژ کِنۍ گُریزَس منٛز سکوٗل 15 مارچس تام بنٛد۔
حُکامو دِیُت شُمٲلی کٔشیٖرِ ہِنٛدِس بانڈی پورہ ضِلعہٕ کِس گُریز سب ڈِویجنَس منٛز سٮ۪ٹھاہ شیٖن تہٕ برفٲنی توپہٕ یِنہٕ کہِ خطرٕ کِنہِ 15 مارٕچ تام تمام سکوٗل بنٛد کرنُک حُکُم۔
یہِ قدم چھُ سارنٕے متعلقَن ہٕنٛز حفاظت یقینی بناونہٕ خٲطرٕ تُلنہٕ آمُت۔
سب ڈِسٹرکٹ مجسٹریٹ گُریز مختار احمد آہنگر سٕنٛدِ طرفہٕ برٛسوارِ دۄہ جٲری کرنہٕ آمتِس أکِس حُکمَس منٛز ووٚن زِ سٮ۪ٹھاہ شیٖن تہٕ برفٲنی توپہٕ یِنہٕ کِس خطرَس مدنظر چھِ گُریز سب ڈِویجنَس منٛز تمام سکوٗل 15 مارٕچ 2025 تام بنٛد روزنُک حُکُم دِنہٕ آمُت تاکہِ طالبہِ علِم تہٕ عملہِ ہِنٛز حفاظت یٔقیٖنی بناونہٕ۔