جموں و کشمیر: ایل او سی یَس پٮ۪ٹھ چھُ تناؤ جٲری،پاکستٲنی فوجَن کٔر لگاتار 11 لَٹہِ بےٚ اشتعال فائرنگ،ہندوستٲنۍ فوجُک مُتٲثر جواب۔

پاکستانی فوجن کٔر آتھوارٕ تہٕ ژندر وارِ دۄہ درمیٲنی رٲژ جموں و کشمیر کٮ۪ن واریٛاہَن علاقن منٛز لائن آف کنٹرول (ایل او سی) پٮ۪ٹھ جنگ بندی ہٕنٛدِ معاہدٕچ خلاف ورزی تہٕ بےٚ اشتعال فائرنگ کٔرمٕژ۔ فوج کِس ترجمانَن ووٚن زِ 4 تہٕ 5 مئی 2025 چہِ درمیٲنی رٲژ کٔر پٲکِستٲنہِ فوجی چوکیَو جموں و کشمیرَس منٛز کپواڑہ، بارہمولہ، پونچھ، راجوری، میندھر، نوشہرہ، سندربنی تہٕ اکھنور کٮ۪ن مُخٲلِف علاقَن منٛز ایل او سی اَپارِ بےٚ اشتعال لۄکٕٹہِ ہتھیارَن ہٕنٛز فائرنگ ۔ تٔمۍ ووٚن زِ تَتہِ موجود فوجیَو دِیُت مؤثر طریقہٕ سۭتۍ تہٕ تناسب سۭتۍ جواب۔
وۄنٛہِ گوٚو، دۄشوٕنی طرفن آو نہٕ کانٛہہ تہِ نۄقصانٕچ اطلاع۔ یہِ چھُ لگاتار 11 ہِم لَٹہِ ییٚلہِ جموں و کشمیر کٮ۪ن سرحدن پٲکِستٲنہِ فوجن نشانہٕ بنوومُت چھُ، ییٚمہِ سۭتہِ بیٚیہِ اکہِ لٹہِ سرحدی بستِین منٛز خوف پٲدٕ گوٚومُت۔ 29 اپریل دۄشوٕنی مُلکَن ہٕنٛدٮ۪ن فوجی آپریشنَن ہٕنٛدٮ۪ن ڈائریکٹر جنرلَن درمیان ہاٹ لائنَس پٮ۪ٹھ کَتھ باتھ کرنہٕ باووٚجوٗد چھِ جنگ بٔنٛدی ہٕنٛدِ معاہدٕچ خلاف ورزی کرنہٕ آمٕژ۔