گانٛدربلَس منٛز گِرِفتار ڈرگ پیڈلر، ممنوعہ مواد برآمد: پولیس
سوسایٹی منٛزٕ منشیاتُک خٲتمہٕ یقینی بناونہٕ خٲطرٕ پنٕنۍ مُہِم جٲری تھٲوِتھ چھِ پولیسَن وسطی کشمیر کِس گاندربل ضلعَس منٛز اکھ ڈرگ پیڈلر گرفتار کوٚرمُت تہٕ أمۍ سٕنٛدِ حراستَس منٛز چھُ ممنوعہ چیز برآمد کوٚرمُت۔
أکِس بیانَس منٛز تفصیٖل دِوان ووٚن پُلیٖسٕکہِ ترجُمانَن زِ پُلیٖس تھانہٕ کھیر بھوانی ہِنٛدِ اکہِ ٹیٖمن کوٚر بڑوسا چوکَس منٛز معموٗلی جانچ دوران اَکھ شخٕص رٹنہٕ ییٚمۍ پُلیٖس وُچھنہٕ پتہٕ ژلنٕچ کوٗشِش کٔر۔
تٔمۍ ووٚن زِ تلٲشی دوران آو أمۍ سٕنٛدِ حراستہٕ منٛزٕ ممنوعہ مواد (کوڈین فاسفیٹ) برآمد کرنہٕ، ییٚمہِ پتہٕ سُہ موقعہٕ پٮ۪ٹھ گِرِفتار کرنہٕ آو۔