راجوری منٛز چھِ مشکوک نقل و حرکتٕچ خبرٕ پتہٕ تلاشی آپریشن جٲری۔

جموں و کشمیر کِس راجوری ضلعہٕ کِس سرحدی علاقَس منٛز چھِ سیکورٹی فورسَن بٔڑِس پیمانَس پٮ۪ٹھ تلاشی مہم شُروٗع کٔرمٕژ۔ دِفٲعی ذٔرایعو مُطٲبِق چھِ پوٗنٛچھ ضِلعہٕ کِس جنٛگلی علاقَس منٛز تلاشی مہم تہِ جٲری۔ یہِ چھُ وننہٕ آمُت زِ آتھٕوارِ دۄہ رٲژ دِژ نوشہرہ علاقَس منٛز أکۍ زنانہِ ترٛےٚ مشکوک نفر ؤچھنٕچ اطلاع، ییٚمہِ پتہٕ سیکورٹی ایجنسیَو کاروٲیی کٔر، علاقَس گیرٕ بٔنٛدی کٔرِتھ تہٕ تلاشی آپریشن شُروٗع کوٚرمُت۔ اہلِکارَن ہُنٛد وَنُن چھُ زِ فوج، سی آر پی ایف، تہٕ جموں و کشمیر پولیسٕک اہلکار چھِ مُشترکہٕ طور تلاشی مُہِمہِ منٛز حصہٕ نِوان۔ کُنہِ تہِ مُمکنہٕ دراندازی یا دہشت گردی ہٕنٛز کوٗشِش رُکاونہٕ خٲطرٕ چھِ حساس علاقَن منٛز تلاشی آپریشن جٲری۔ ذٔریعہٕ چھِ اِشارٕ کَران زِ سیکورٹی فورس چھِ علاقَس منٛز گشت تہٕ نگرٲنی مٔزیٖد تیز کران، ییٚلہِ زَن مقٲمی بسکیٖنَن چھُ ہوشیار روزنُک تہٕ فوری طور کُنہِ تہِ مشکوک سرگرمیٕچ اطلاع دِنُک مشورٕ دِنہٕ آمُت۔